17–19 qazan aralyǵynda Almaty oblysynda ornalasqan «Almaty Horse & Polo Club» bazasynda atpen mánerlep júrýden Qazaqstan Respýblıkasynyń chempıonaty ótti. Úsh kúnge sozylǵan ártúrli jas erekshelikterine oraı birneshe sanat boıynsha uıymdastyryldy.
Chempıonat baǵdarlamasyna Halyqaralyq at sporty federasıasynyń (FEI) synaqtary engizildi. Elimizdiń eń úzdik shabandozdary at ústindegi sheberligin sportsúıer qaýymǵa pash etip, ásemdik pen tártiptiń úılesimin kórsetti.
At sportynyń bul túri – shabandoz ben at arasyndaǵy baılanys synalatyn erekshe sport túri. Munda atpen júrgen kezdegi tepe-teńdik, qozǵalys dáldigi jáne tizgindi meńgerý sheberligi baǵalanady. Sondyqtan bul sport túri kóbine «AT ústindegi balet» dep atalady.
Qazaqstan at sporty federasıasynyń bas hatshysy Azat Tolqymbekovtyń aıtýynsha, elimizde keıingi jyldary at sportyna, sonyń ishinde mánerlep júrýge qyzyǵýshylyq artyp keledi.
“Elimizde atpen mánerlep júrý sportynyń tereń ári baı tarıhy bar. Máselen, aty ańyzǵa aınalǵan Absent tulpary Sergeı Fılatovtyń basqarýymen Olımpıada chempıony atanǵan bolatyn. Bul – bizdiń maqtanyshymyz. Áli de jetetin jetistikter kóp”, - deıdi ol.
Ejelgi Grekıada áskerı daıyndyq retinde paıda bolǵan sport túri búgingi tańda Olımpıada oıyndary men álem chempıonattarynyń resmı baǵdarlamasyna engen. Jarystardy uıymdastyrý jáne baǵalaý FEI – Halyqaralyq at sporty federasıasynyń erejeleri negizinde júrgiziledi.
Men úshin eń qıyny – jylqyny basqarý boldy, – deıdi almatylyq shabandoz Venera Altıeva, – degenmen, bul synaqty abyroımen eńsere aldym. Bul jarysqa uzaq ýaqyt boıy tyńǵylyqty daıyndaldyq. Jattyǵýlar barysynda ózara túsinistikke, úılesimdilikke kóp kóńil bóldik. Prıns esimdi frız tuqymdy tulparymmen el chempıonatyna alǵash ret qatystym. Jarystyń barlyq talabyn durys oryndaýǵa kúsh saldyq”, - deıdi Venera Altıeva.
Qazaqstandaǵy at sportynyń damýy eldiń halyqaralyq deńgeıdegi bedelin arttyrýǵa jáne salaýatty ómir saltyn nasıhattaýǵa baǵyttalǵan mańyzdy qadam bolyp otyr. Osyndaı chempıonattar – jas shabandozdarǵa tájirıbe almasýǵa jáne sporttyq jetistikterge jetýge múmkindik beretin mańyzdy alań.