Bizdiń qalanyń turǵyndary
Janna Asanova osydan 2 jyl buryn Almatynyń Alataý aýdandyq «Baqytty otbasy» ortalyǵyna ózin izdep kelgen. Ózin izdegeni qalaı dersiz, ıá, ol ómirde ózin joǵaltyp alǵan bolatyn. İzdegenin tapty ma? Bul saýaldyń jaýabyn ózimen órbigen tómendegi áńgimeden izdep kóreıik.
Janna jórgeginen mektep bitirgenge deıin balalar úıinde ósti. Ata-anasyn múldem kórgen emes, tegin de bilmeıdi. Dúnıege kelgennen kóziniń jáne aıaǵynyń aqaýy (dısplazıa) bar bolyp týypty. Kishirek kezinde, júrgende aıaǵy aıaǵyna shalynysyp qulap qala beredi eken. Balalar úıinde, odan tys jerlerde ótetin, máselen, Prezıdenttik shyrsha syndy saltanatty is-sharalarǵa eshqashan baryp kórgen emes. Anyǵy sol, eshkim ertip aparǵan emes. Qazir oılap qarasa, tárbıeshiler munyń syrt kelbetin ondaı keshterge laıyqsyz kórgen eken ǵoı. Tipti, bir tárbıeshisiniń «seni bolashaqta áldeqandaı jetistikke jetedi dep oılamaımyn, sen kúıeýge de shyqpaıtyn shyǵarsyń» deıtini de áli esinde. Mundaı sátterde, árıne, Janna qystyǵyp jylap qalatyn. Ózin qorǵansyz, kereksiz sezinetin.
9-synypta oqyp júrgeninde balalar úıine qaıyrymdylyq aksıasy aıasynda sheteldikter kelip, densaýlyǵynda kináraty bar birneshe jasóspirimge qoldaý kórsetkeni bar. Solardyń qatarynan Janna da tabyldy. Kózine tegin ota jasalyp, ómirge de, ózgege de týra qaraı bastady.
***
Balalar úıinen shyqqan soń, ózi sekildi zamandastarymen birge «Jastar úıine» ornalasty. Biraq aıtýynsha, olardyń kóbi ómirge beıim emes edi. Kózin ashqaly daıyn tamaq, salýly tósekte ósken olar úlken ómirge aralasa bastaǵanda kóp qınalypty. Tipti, tamaq jasap ishý, qolyna tıgen azyn-aýlaq aqshany qalaı jumsaý kerektigin de bilmegen. Otbasy, ondaǵy adamdardyń bir-birine qarym-qatynasy qandaı bolýy kerek degen syndy qundylyqtar týraly da múldem habary joq qyz 19 jasynda bala súıedi. Biraq kóp uzamaı qyzynyń ákesi ekeýiniń joly ekige aıyrylady.
Joqshylyqtyń qamytyn kıgen qyz bóbegin ashtan óltirip almas úshin kez kelgen jumysty isteıdi. Perzentiniń óz ómirin qaıtalaǵanyn jan-tánimen qalamaǵan edi. Biraq qolynda dıplomy, jol kórseter janashyr týysy, ne turaqty jumysy joq qyzdyń bir kezderi synyp ketken sátteri de boldy. Qatty kúızeliske tústi. Kafede istep júrgende birge júrgen qyzdarmen «júıkemizdi tynyshtandyraıyq», «ómirimizdi sál de bolsa jeńildeteıik» degen jeleýmen áýeli syra ishe bastady, arty ishimdikke ulasty. Biraq qyzyn eshqashan eshkimge qaldyryp ketken emes, únemi jetektep júretin. Keıin uly Sultan ómirge keldi. Birde qyzy Iasmın, 5 jastaǵy kezi bolýy kerek, «Mama, ishpeńizshi! Maǵan bulaı júrgenińiz unamaıdy! Sizde biz barmyz ǵoı!» deıdi jalynyshty únimen. Osy bir aýyz sóz Jannanyń sanasyn silkip jibergendeı boldy. Esti qyz shynashaqtaı qyzynyń júrekjardy ótinishine qulaq asty.
***
Bir qurbysynan ómirde qınalyp júrgen analarǵa qolushyn beretin «Baqytty otbasy» degen ortalyq baryn estip, sol jerdiń tabaldyryǵynan ımene attady. Aqmaral Basırova jetekshilik etetin Alataý aýdandyq «Baqytty otbasyndaǵy» qyz-kelinshekter ár qadamyn tym senimsiz basqan, tuıyqtaý jas kelinshekti jatsynbaı, baýyryna tarta bildi. Psıholog ta jeke áńgimelesti. Olar Jannaǵa jabyla jol kórsetti. Qolyna qarmaq ustatty. Oǵan sendi.
Janna Asanova ortalyqqa áýeli áleýmettik qyzmetker bolyp qabyldandy. Koronavırýs órship turǵan sol tusta Alataý aýdandyq «Baqytty otbasynyń» áleýmettik qyzmetkerleri túrli qaıyrymdylyq qorlarynan kelip túsip jatqan azyq-túlikterdi turmysy tómen muqtaj jandarǵa, jalǵyzilikti qarttar men analarǵa, kópbalaly otbasylarǵa kún-tún demeı taratyp júrdi. Sol kezderde osyndaı jankeshti jumysqa shydamaı ketip qalǵandar da boldy. Al týmysynan tózimdi Janna ketpedi. Qazir ol – «Baqytty otbasynda» resepshn. Ortalyqqa kelgen adamdy birinshi bolyp qabyldaıtyn, jón silteıtin, baǵyt kórsetetin maman. «Baqytty otbasynyń» esigin ashatyn ár adamǵa jyly júregin arnaýǵa tyrysady. Olardyń baqytty bolýy úshin kishkentaı da bolsa úlesin qosýǵa umtylyp júrgen jaıy bar. Osynda jumys isteı júrip, vızajıst kýrsyn tegin oqyp shyqty.
***
Jannanyń osy kezge deıingi ómirin úlken kúızelispen, senimsizdikpen, qıyndyqpen ótkizse de, eshkimge kektenbegeni, júregin qaraıtyp almaǵany, ornyqty minezi unady bizge. Tipti, ata-anasy tabylyp jatsa, olarǵa da esh renjimeıtinin jetkizdi. «Elimiz Táýelsizdik alyp jatqan jyly dúnıege kelippin. Ol tusta kimge ońaı boldy deısiz?! Qıynshylyq búkil eldiń basyna túsken jyldar ǵoı. Sondyqtan ata-anama ókpem joq», – deıdi keń júrekti Janna.
«Saıaly» shaǵynaýdanynda Almaty qalasynyń ákimdigi tarapynan berilgen páteri bar. Tańerteń jumysyna asyǵyp keledi, keshke úıine qýanyp qaıtady. Eki qulyny aldynan kishkentaı qushaqtaryn ala júgirgende júregi qýanyshqa tolyp ketetini bar. Ózin bala kúninde eshkim bulaı qushaqtamaǵan-dy. Ózi sezine almaǵan jylýdy balalarynan aıap qalǵysy joq. Jyly da taza úı, mol dastarhan. Eki balasy da túrli úıirmelerge baryp júr. Iasmın dombyra tartady, úlken sahnalarǵa shyǵýdy armandaıdy. Al kishkentaı Sultan bos ýaqytynda oılaý qabiletin shynyqtyratyn «Lego» oıynyn qurastyrǵandy jaqsy kóredi.
Mine, Almatyǵa osylaı taǵy bir baqytty otbasy qosyldy. Ol úshin birinshi kezekte «Baqytty otbasyna» alǵys aıtady.
Aıtpaqshy, Janna Asanova «Bıznes-Bastaý» baǵdarlamasy arqyly kýrstan ótip, áriptesteriniń qoldaýymen óziniń tól bıznes-jobasyn jasap shyqty. Bolashaqta balalardy oqytý, damytý ortalyǵyn ashpaq nıette. Biz oǵan, árıne, senemiz.