Astana mektep oqýshysy zaǵıp jandarǵa arnaıy kózildirik oılap tapty. Aqshamnews.kz tilshisi ónertapqyshpen qurylǵy týraly suhbattasty.
Astanada Qoshke Kemeńgeruly atyndaǵy №49 mektep-gımnazıasynyń 10-synyp oqýshysy Qýandyq Amırhan kózi nashar kóretin jandardyń ómirin jeńildetýdi maqsat etken erekshe joba ázirledi. Bul - zaǵıp adamdarǵa arnalǵan "aqyldy kózildirik". Onyń basty ereksheligi – qazaq tilinde jasalǵan otandyq ınovasıa men baǵasynyń qoljetimdiligi.
Qýandyq Amırhannyń aıtýynsha, bul ıdeıa oǵan bir jyl buryn Almaty metrosynda bolǵan oqıǵadan keıin kelgen. Sol kezde metro astyna túsip, qaza tapqan zaǵıp jannyń jaǵdaıy búkil eldi dúrsilkindirgen edi.
"Bul qaıǵyly jaǵdaı týraly robototehnıkadan beretin jetekshi aǵaıymnan bildim. Ol usynys jasaǵanda birden kelistim. Nátıjesinde osyndaı týyndy paıda boldy. Zaǵıp jandarǵa tıtteı bolsyn kómek bolady degen senimdemiz", - deıdi Qýandyq Amırhan.
Anyqtama: 2024 jyly 10 jeltoqsanda Almatydaǵy metroda bir adam relske túsip, qaıtys boldy. Keıin "Abaı" beketi ýaqytsha jabylǵan edi. Bir jyldan soń beketterde qorshaýlar qoıyla bastady. Metropolıten málimetine súıensek, "Raıymbek batyr" beketinde bıyl aqpanda metropolıtenniń zamanaýı qaýipsizdik standarttaryna sáıkes keletin jańa ýaqytsha qorshaýlar ornatylǵan. Olar eki negizgi qyzmet atqarady: qorǵanys quraly jáne jarnamalyq qurylym retinde paıdalanylmaq.
Ónertapqyshtyń aıtýynsha, qurylǵyny jasaýǵa nebary 1 apta men 10 myń teńge jumsalǵan. Jobany Qýandyq Amırhannyń jetekshisi tolyq qarjylandyrǵan.
"Aqyldy kózildiriktiń" basty ereksheligi - ol adamnyń aldyndaǵy kedergini bir metr qashyqtan anyqtap, qazaq tilinde:
"Saqtanyńyz, aldyńyzda kedergi!" - degen daýys arqyly eskertedi.
Bul júıe zaǵıp jandarǵa qala kóshelerinde erkin ári qaýipsiz qozǵalýyna múmkindik beredi.
"Meniń maqsatym - múmkindigi shekteýli adamdardy qoǵamnyń tolyqqandy múshesi retinde sezinýine kómektesý. Qazir kózildiriktiń basqa da nusqalaryn jetildirýdi josparlap júrmin. Qazir qurylǵy tek dybystarǵa áser etip, belgi beredi. Ony jetildirip, tek dybys emes, sonymen qatar, beıne baqylaý ornatyp, aldyndaǵy kedergilerdi de baıqaıtyndaı múmkindik jasaǵymyz keledi", - deıdi jas ónertapqysh.
Qýandyq Amırhannyń aıtýynsha, qurylǵynyń baǵasy qoljetimdi bolmaq.
"Qazir 285 mıllıon adam kórý qabiletinen aıyrylǵan. Al elimizde 10 myńnan asa adam osy qıyndyqpen ómir súrip júr. Baǵany 15 myń teńgege jýyqtap qoıamyz dep josparladyq. Áli naryqqa shyǵarǵan joqpyz. Bizdiń maqsat - ınnoasıa arqyly qoǵamda paıdaly bolý, adam ómirin jeńildetý", - deıdi oqýshy.