Qasym-Jomart Toqaev pen Sadyr Japarov Astanadaǵy Aıkól Manas eskertkishin saltanatty túrde ashty
Memleket basshysy sharada sóılegen sózinde elordada mundaı eńseli eskertkishtiń boı kóterýi, eń aldymen, qazaq halqynyń qyrǵyz aǵaıynǵa degen rıasyz qurmetiniń belgisi ekenin atap ótti, dep habarlaıdy almaty-akshamy.kz.
– Eki jyl buryn Bishkekte uly Abaıdyń eskertkishi ashylǵanyn bilesizder. Men sol sharaǵa arnaıy baryp qatystym. Mundaı ıgi bastamalar eki eldiń dostyq baılanysyn nyǵaıta túsetini sózsiz, – dedi Qazaqstan Prezıdenti.
Qasym-Jomart Toqaev myńjyldyq tarıhy bar Manas jyryn barsha adamzat rýhanıatynda ózindik orny bar biregeı mura retinde atap ótip, ony tek qyrǵyz halqynyń ǵana emes, tutas túrki jurtynyń baǵa jetpes qazynasy deýge bolatynyn aıtty.
– Áıgili jyrdyń zaman synaǵynan aman ótip, búgingi kúnge jetýine qazaq ǵalymdary zor úles qosqan. Osy oraıda Shoqan Ýálıhanov, Muhtar Áýezov, Álkeı Marǵulan sıaqty birtýar tulǵalardy atap ótýge bolady, – dedi Qasym-Jomart Toqaev.
Qazaqstan Prezıdenti eki eldiń mádenı muralarynyń tamyry bir ekenine nazar aýdaryp, qazaq pen qyrǵyzdyń áıgili tulǵalary qaı kezde de ózara tilektes, nıettes bolǵanyna toqtaldy. Memleket basshysy elimizdegi sý tasqynyna qarsy kúreste kómek qolyn sozǵan barsha qyrǵyz jurtyna qazaq eliniń atynan zor rızashylyǵyn bildirdi.
– Bas qalamyzda boı kótergen osy sáýlet týyndysy túbi bir túrki jurtynyń birligin kórsetedi. Bul – Manasqa ǵana emes, qazaq pen qyrǵyzdyń máńgilik baýyrlastyǵyna qoıylǵan eskertkish. Men eki eldiń dostyǵy eshqashan myzǵymaıdy dep senemin, – dedi Qasym-Jomart Toqaev.
