Qazaqstanǵa AQSH-tan poshta arqyly esirtki jetkizbek bolǵandardyń isi áshkerelendi.
Jyl basynan beri elorda aýmaǵynda 362 esirtki qylmysy tirkeldi. Bul týraly Astana qalalyq polısıa departamentiniń esirtki qylmysyna qarsy is-qımyl basqarmasynyń bastyǵy Rýstam Ǵazızov aıtty, dep habarlaıdy Almaty-akshamy.kz Qazaqparatqa silteme jasap.
«Jyl basynan beri 362 esirtki quqyq buzýshylyǵy tirkeldi. Onyń ishinde 68-i aýyr jáne asa aýyr qylmystar sanatyna jatady. Tergeý jumystary aıaqtalyp, sotqa 49 qylmystyq is joldandy. Onyń ishinde asa aýyr – 21, aýyr sanattaǵy 28 is bar. Jyl basynan beri Astana qalasynyń aýmaǵynan shamamen 14 keli sıntetıkalyq esirtki tárkilendi. 2022 jyly 4 esirtki zerthanasy anyqtaldy», - dep toqtaldy Rýstam Ǵazızov.
Qosa ketsek, Qazaqstanǵa AQSH-tan poshta arqyly esirtki jetkizbek bolǵandardyń isi áshkerelendi. QR Qarjylyq monıtorıń agenttiginiń dereginshe, esirtki zattary basqa zat túrinde shtattardan Almaty qalasyna jiberilip, odan ary Astanaǵa jóneltilgen.