"Qazgıdromet" Astana turǵyndaryna eskertý jasady, - dep habarlaıdy Aqshamnews.kz tilshisi.
"4 tamyzda Atyraý jáne Astana qalalarynda túnde qolaısyz meteorologıalyq jaǵdaı bolady", – delingen habarlamada.
Anyqtama: Qolaısyz meteojaǵdaılar – bul jerge jaqyn atmosfera qabatynda zıandy (lastaıtyn) zattardyń jınalýyna yqpal etetin qysqa merzimdi meteorologıalyq faktorlardyń (tynyq aýa, álsiz jel, tuman, ınversıa) úılesimi.
Inversıa – bul jyly aýa qabaty sýyq aýanyń ústinen ornalasyp, ony "jaýyp" turatyn aýa raıy qubylysy. Ádette, jer betindegi jyly aýa joǵary kóterilip, lastaýshy zattardy ózimen alyp ketedi. Biraq ınversıa kezinde sýyq aýa tómende qalyp, sol aýamen birge barlyq gaz, shań men tútin de jer betinde turyp qalady. Nátıjesinde, ásirese qalalarda, lastaný kúsheıedi.
Astanadaǵy aýa raıy
4 tamyzda elordada kóshpeli bultty aýa raıy bolady, jaýyn-shashyn kútilmeıdi. Jel soltústik-shyǵystan soǵady: túnde jyldamdyǵy 3–8 m/s, kúndiz 9–14 m/s. Aýa temperatýrasy túnde +9...+11°S, kúndiz +18...+20°S shamasynda bolady.
Qazaqstandaǵy tamyzda aýa raıy qandaı bolady?
Buǵan deıin "Qazgıdromet" sınoptıkteri 2025 jylǵy tamyzǵa arnalǵan aýa raıy boljamyn usynǵan bolatyn. Jazdyń sońǵy aıy eldiń basym bóliginde jyly bolady dep kútiledi. Alaıda respýblıkanyń ońtústigi men ońtústik-batysynda aýa temperatýrasy klımattyq normadan joǵary bolady.