Tarıh sahnasynda qandaı eldiń de egemendi el bolýy ońaı dúnıe bolmaǵan. Al egemendigin alǵan eldiń ósip-órkendep, damyǵan el bolýy óte aýyr úrdis ekenin jaqsy bilemiz. Bul sol eldiń basshysyna da, halqyna da úlken syn bolady.
Qazaq halqynyń egemendi el bolǵanyna 30 jyl boldy. Bul tarıhı damý turǵysynan alyp qaraǵanda kóp ýaqyt emes, biraq HHİ ǵasyrda, ár kúnniń salmaǵy eselep aýyrlap turǵanda, ýaqytpen durys sanasý kerek.
Óziniń 30 jyldyq ómirinde aldymen ekonomıkalyq damýdy basty maqsat etip qoıǵan elge saıası reforma aýadaı qajet boldy. Muny halyq ta, Memleket basshysy da jaqsy sezindi, jaqsy túsindi. Qasym-Jomart Toqaev ózi aıtqandaı, uzaqqa qaldyrmaı, álemde bolyp jatqan asa kúrdeli jaǵdaılardy eskere otyryp, elimizde saıası reforma jasaý jónindegi óz oıyn halyqqa jarıa etti. Halyq bolsa, tapjylmaı otyryp muqıat tyńdady, tyńdady da ıyǵynan aýyr júk túskendeı, tolǵanysty rızashylyq sezimmen qabyl aldy dep oılaımyn.
Joldaýda aıtylǵan, saıası reforma jasaýdyń 10 baǵytyn da tolyq qoldaımyn. Prezıdent aıtqandaı, Joldaýdyń ár baǵyty kóp tebirenip, kóp tolǵanyp, tereń oılanystan týǵan sheshimder ekeni baıqalady. Ár baǵyttyń astary tym tereńde jatyr, olar qaltqysyz túsinip, el bolyp jumyla otyryp qyrýar is tyndyrýdy qajet etedi. Biz, bul arada, osyndaı saıası reforma jasaýda keshigińkirep qalǵanymyzdy da eskerýimiz qajet. Olaı bolsa, endi ýaqyttan utylýǵa bolmaıdy.
Men, budan 30 jyl buryn memlekettik deńgeıde bilim salasynda reforma jasaýǵa tikeleı qatysqan janmyn. 1992 jáne 1996 jyldary daıyndalǵan, elimizdiń Bilim berýdi damytý baǵdarlamalaryn jasaý úshin qurylǵan ýaqytsha jumys tobyna basshylyq jasadym. Sodan beri osy salany damytý problemalarymen ǵylymı ári praktıkalyq turǵyda úzbeı shuǵyldanyp kelemin. Bul baǵytta oqyǵan-toqyǵanym, kóńilge túıgenderim, atqarǵan isterim, álemdik deńgeıde moıyndalǵan ǵylymı oı-tujyrymdarym bar, ıaǵnı elimizdiń bilim berý saıasatyn jetildirýge qatysty ózindik oı qalyptastyrǵan janmyn.
Jas urpaqqa sanaly tárbıe, sapaly bilim kez eldiń ósip-órkendeýiniń túp qazyǵy bolatyn bolsa, osy baǵytta Úkimettik emes uıym – Pedagogıkalyq Ǵylymdar akademıasynyń músheleri Memleket basshysy Qasym-Jomart Kemeluly Toqaevty tolyq qoldap, árqaısymyz osy reformany iske asyrý maqsatynda tıanaqty ister atqaratyn bolamyz.