Áleýmettik máselelerdi sheshýmen qatar saıası suranysty qanaǵattandyrý kezek kúttirmes mańyzdy suraq ekeni belgili, óıtkeni ol – qoǵamdy jańartýdyń birden-bir joly.
Prezıdent Q.Toqaevtyń aldynda basy epıdemıadan bastalyp, sońy qańtardaǵy qaqtyǵystar men ýshyqqan geosaıası kıkiljińder saldarynan abyrjyp qalǵan qoǵamdy ekonomıkalyq daǵdarystan aman alyp shyǵý, júzdegen etnos, dinı konfesıa ókilderinen quralǵan halyqtyń basyn biriktire otyryp, memlekettiń ishki saıası turaqtylyǵyn qalyptastyrý, almaǵaıyp zamanda syrtqy saıası baǵyt-baǵdardy asqan baıyptylyqpen abaılap anyqtaý mindeti tur.
Táýelsizdiktiń bastapqy jyldary ómirsheń ekendigi rastalǵan «Áýeli – ekonomıka, al sonan soń – saıasat» taktıkasynan sóz júzindegi emes, is júzindegi naqty saıası reformalar strategıasyna qadam basý – óte mańyzdy sheshim. Sonyń kórinisi retindegi sýperprezıdenttik basqarý formasynan Parlamenti myqty Prezıdenttik respýblıka tásiline túbegeıli ótý, «Myqty Prezıdent – yqpaldy Parlament – esep beretin Úkimet» formýlasyn is júzinde oryndaý, proporsıonaldy jáne majorıtarly aralas saılaý júıesin engizý, saıası partıalardy tirkeý prosedýrasyn jeńildetý ári múmkindikterin keńeıtý jáne t.b.
Ásirese, Prezıdenttik ókilettilikke shamadan tys ústemdik berýden bas tartý jolynda Prezıdenttiń jaqyn týystarynyń saıası memlekettik qyzmet atqarýyna, kvazımemlekettik sektor basshysy bolýyna tyıym salý; Prezıdenttik ókilettiligin atqarý kezinde saıası partıaǵa múshelikti toqtatý; Memleket basshysynyń oblys, respýblıkalyq mańyzy bar qala jáne astana ákimderi aktileriniń kúshin joıý nemese toqtata turý jónindegi quzyretin alyp tastaý; aýdan, qala, aýyldyq okrýg ákimderin qyzmetinen alý quqyn joıý, t.s.s. tolǵaýy jetken sheshimder Joldaýda kóptep keltirilgen.
Prezıdent ishki saıasat máselesine, áleýmettik kóńil kúıge, eldi biriktirýshi murattarǵa jiti nazar aýdarylatyndyǵyn baıqatyp otyr. Táýelsizdikti nyǵaıta túsýdiń basty sharttarynyń biri – adamdardyń boıynda elimizdiń tirshiligin baıandy etetin ulttyq kelisim rýhyn jáne otansúıgishtik sezimin nyǵaıtý. Negizi, men osy Joldaýdy ata býynnyń táýelsizdik syndy asqaq armanyn júzege asyrǵan búgingi aǵa býyn ókilderiniń bolashaqty noqtalaıtyn jastarǵa degen saıası amanaty dep qabyldadym.