Búgin elimizdiń shyǵys jáne batys óńirlerinde jas shekarashy sarbazdar saltanatty túrde ant qabyldap, Otanyna adal qyzmet etýge sert berdi. Osy mańyzdy sáttiń kýási bolý úshin alystan kelgen ata-áje, áke-sheshe, týǵan-týystary men dostarynyń júzderinen qýanysh kórinip turdy.
Osyndaı saltanattyń biri UQK Shekara qyzmetiniń Almaty oblysy boıynsha departamentine qarasty Qarasaı aýdany shekara basqarmasynyń Aqjardaǵy tehnıkalyq jáne kásibı daıarlyq bóliminde ótti. Jas jaýynger synyn sátti eńsergen 500-den astam sarbazdy departament bastyǵy polkovnık Á. Kaıýpov, «Generaldar keńesi» respýblıkalyq qoǵamdyq birlestiginiń tóraǵasy, otstavkadaǵy general-leıtenant B. Sársekov, Qazaqstan Respýblıkasy Mas-Restlıng (taıaq tartý) federasıasynyń vıse-prezıdenti T. Qanalıev jáne zapastaǵy polkovnık D. Mamyrhanov bastaǵan shekarashy ardagerler quttyqtady.
UQK Shekara qyzmetiniń áleýmettik jelidegi resmı paraqshasy arqyly el jurtshylyǵy tikeleı efırden tamashalaǵan rásimde ata-analardyń qýanyshty júzderin kórýge bolady. Olardyń biri, 75 jastaǵy B. Dúıseǵalıeva tuńǵysh nemeresiniń qýanyshyna ortaqtasý úshin Batys Qazaqstannan arnaıy kelipti. Ant qabyldaýǵa kirisken nemeresine meıirimmen qarap turǵan taǵy bir ájeıdi kórip, osynaý áserli sátti sýretke túsirip alýǵa tyrystyq.
«Generaldar keńesi» respýblıkalyq qoǵamdyq birlestigin basqaratyn Beksultan Sársekuly saltanatty sharanyń mańyzyna toqtala otyryp:
— Búgingi kún erekshe! Jas sarbazdar Táýelsiz eldiń shekarasyn qorǵaýǵa sert berýde. Ata-babamyzdan amanat bolyp qalǵan ulan-ǵaıyr jerimizdi kózdiń qarashyǵyndaı qorǵańdar. Halqymyzdyń senimin aqtańdar, — dep, aǵalyq tilek bildirdi.
Aıta ketý kerek, «Srochnık 2.0» baǵdarlamasy aıasynda «Kúz-2023» shaqyrylymynyń eki sarbazy – qatardaǵy jaýyngerler A. Artyqjanov pen E. Tileýbekke departament bastyǵy polkovnık Álibek Kaıýpov arnaıy sertıfıkattar tabystady. Bul sertıfıkattar olarǵa ózderi tańdaǵan joǵary oqý oryndarynda bilim alýǵa múmkindik beredi. Sondaı-aq, shara kezinde jaqynda ótken «Taıaq tartý» saıysynyń jeńimpazy atanǵan birneshe sarbazdy Qazaqstan Respýblıkasy Mas-Restlıng federasıasynyń vıse-prezıdenti T. Qanalıev maqtaý qaǵazy jáne medaldarmen marapattady.
Shara shekara basqarmasynyń arnaıy maqsattaǵy utqyr toptyń jaýyngerlik qımyldaryna arnalǵan kórinisterimen jalǵasty. Shekara qyzmetiniń Qyzmettik kınologıa basqarmasy ıtteriniń sheberligin kórsetip, kórermenderdi tánti etti.
Ant qabyldaý rásiminen keıin sarbazdar ata-analary men týǵan-týystarymen qýanyshpen qaýyshyp, bolashaq el qorǵandary ózderiniń maqtanysh sezimderin jasyra almady.