Almatyda Qala kúnin merekeleý aıasynda Qazaq memlekettik sırkiniń «Ashyq aspan astyndaǵy sırk» atty biregeı shoýy ótti.
Sahnada Gran-prı ıegerleri men halyqaralyq sırk óneri festıvaliniń altyn júldegerleri óner kórsetti. Shoý baǵdarlamasynda trapesıa nómirleri, áýe gamagyndaǵy gımnastıka, akrobatıka, jonglerler, saıqymazaqtar jáne ózge de kelgen qaýymdy qyzyqtyrǵan nómirler boldy.
– «Ashyq aspan astyndaǵy sırk» shoýy osymen qatarynan 2 jyl ótip otyr. Merekelik shara Qala kúnine oraı uıymdastyryldy. Negizinen, ashyq aspan astynda óner kórsetý ártister úshin ońaı emes. Óıtkeni, manej ústinde qajetti qural-jabdyqtar ornatylsa, al ashyq dalada olardyń barlyǵy bola bermeıdi. Degenmen, bizdiń ártisterimiz jan-jaqty bolýǵa úırenip keledi. Sondyqtan biz úshin bul joba qajet. Búgingi shoýda qaýipti trúkter de kórsetiledi. El aýzynda «Batyldyq dóńgelegi» atalǵan qurylymda akrobattarymyz óner kórsetedi, – dedi Qazaq memlekettik sırkiniń dırektory Maqsat Jaıkov.
Sondaı-aq, Maqsat Maratbekuly taıaýda ótken halyqaralyq jarystan almatylyq akrobatshylardyń júlde alǵany týraly pikir bildirdi.
– 14–17 qyrkúıek arasynda Reseıdiń Sankt-Peterbýrg qalasynda 2-shi halyqaralyq sırk festıvali ótti. Bul álemdegi eń úzdik festıválderdiń biri. Sırk áleminiń olımpıadasy deýge bolady. Onda 16 elden barlyǵy 200-ge jýyq ártis qatysty. Festıvál qorytyndysy boıynsha «Qos machtadaǵy akrobattar» nómirin oryndaǵan Hassak toby qola júldege ıe boldy. Bul Almaty sırki men jalpy elimiz úshin úlken jetistik. Bolashaq josparlarymyzǵa keletin bolsaq, biz sırkti 2 deńgeıge bólemiz: respýblıkalyq jáne halyqaralyq. Respýblıkalyq baǵyt boıynsha biz óz kórermenderimizge, qala turǵyndary men qonaqtaryna ártúrli shoýlar jasaı beremiz. Qazir kóp jyldardan beri kelmegen Saha eliniń (Iakýtıa) ártisteri kelip, ónerlerin pash etýde.
Sondaı-aq, bıyl Almatyda alǵash ret halyqaralyq sırk festıvalin uıymdastyrdyq. Oǵan 15 elden ártister qatysty. Bul bastamany ári qaraı halyqaralyq deńgeıde damyta berý josparymyzda bar, festıvál kelesi jyly jalǵasyn tappaq. Monte-Karloda 46 jyl qatarynan festıvál uıymdastyrylyp keledi, al bizdiń 50 jyldyq tarıhymyzda bul birinshi ret boldy. Sondyqtan ony dástúrli úrdiske aınaldyryp, qazaq sırk ónerin damytý, halyqaralyq qatynastardy damytý josparda bar, – dedi Qazaq memlekettik sırkiniń dırektory.