Almaty qalasynyń kúnine oraı Abaı atyndaǵy Qazaq ulttyq opera jáne balet teatry kóne klasıka men zamanaýı sahnanyń toǵysqan álemin pash etetin «Mura» atty gala-konsertin usynady. Bul shara teatrdyń 91-shi maýsymynyń ashylýy aıasynda ótedi jáne qala turǵyndaryna erekshe áser qaldyratyn jaryq shoýymen umytylmas kesh syılamaq. Gala-konsert 15 qyrkúıek kúni saǵat 19:00-de teatr alańynda ótedi, dep habarlaıdy aqshamnews.kz
Bul keshte ónersúıer qaýymdy Qazaqstannyń halyq ártisi Nurjamal Úsenbaeva, Qazaqstannyń eńbek sińirgen qaıratkerleri Jámılá Baspaqova men Gúlzat Dáýirbaeva, «Qurmet» ordeniniń ıegeri Zarına Altynbaeva, halyqaralyq baıqaýlardyń jeńimpazdary Nurjan Bajekenov, Farhad Kýbıev pen Venera Alpyspaeva jáne teatrdyń basqa da juldyzdary óz sheberlikterimen qýantady. Gala-konserttiń dırıjeri — Qazaqstannyń eńbek sińirgen qaıratkeri Nurjan Baıbosynov.
Abaı atyndaǵy Qazaq ulttyq opera jáne balet teatrynyń alańy buryn-sońdy bolmaǵan úlken sahnaǵa aınalady. Konsert baǵdarlamasy úzdik opera jáne balet qoıylymdarynyń kórinisterimen tolyqtyrylady. Qozǵalmaly sahnada kórermenderge súıikti ánder men bılerden shashý shashylady. Jan tebirenter gala-konsert arqyly asqaq ónerdiń altyn murasy qala turǵyndaryna tartý etiledi.
Abaı teatry elimizdegi eń úlken óner oshaǵy retinde óz mısıasyn maqtanyshpen jalǵastyryp keledi. «Basty maqsatymyz — 90 jyldan astam tarıhy bar kıeli sahna maıtalmandarynyń sheberligin óskeleń urpaqqa nasıhattap, jyldar boıy qalyptasqan ádemi dástúrdi zaman aǵymyna saı jańartyp, kórermendermen baılanysty odan ári nyǵaıtý», — dep atap ótti Abaı atyndaǵy QazUOBT dırektory Aınur Kópbasarova.
Teatr ujymy jańa maýsymyn ásem áýender men kóz tartarlyq shoýmen bastamaq. Jaryq shoýyn qoıý úshin bedeldi «Zolotaıa maska» teatr syılyǵynyń ıegeri, halyqaralyq jobalardyń qatysýshysy, tanymal jaryq qoıýshy sýretshi Tatána Mıshına shaqyryldy. Abaı atyndaǵy teatrdyń shyǵarmashylyq ujymy barsha Almaty turǵyndary men qonaqtaryn osy erekshe keshke shaqyrady.
Mekenjaıy: Abaı atyndaǵy Qazaq ulttyq opera jáne balet teatry, Almaty q., Qabanbaı batyr kósh., 110. Teatr alańy.