Taýly Qarabaq aımaǵyndaǵy qaqtyǵystyń shıelenisýinen keıingi alǵashqy kezdesý
Memlekettik hatshy Armenıa men Ázirbaıjan syrtqy ister mınıstrlerimen úshjaqty kezdesý ótkizdi, dep habarlaıdy Almaty-akshamy.kz Tengrinews.kz-ke silteme jasap.
AQSH memlekettik departamenti saıtynda jarıalanǵan málimette AQSH memlekettik hatshysy Entonı Blınkenniń Armenıa jáne Ázirbaıjan syrtqy ister mınıstrleri Ararat Mırzoıan jáne Djeıhýn Baıramovpen kezdesýi Taýly Qarabaq aımaǵyndaǵy qaqtyǵystyń shıelenisýinen keıingi alǵashqy kezdesý bolǵany aıtylǵan.
AQSH syrtqy saıası vedomstvosy málimdemesinde Mırzoıan jáne Baıramovpen kezdesý kezinde Blınken qaqtyǵys kezinde adamdardyń qaza bolýyna baılanysty kóńil aıtqany jáne odan ári soǵys qımyldarynyń aldyn alý qajet ekenin aıtqany kórsetilgen.
"Premer-mınıstr Pashınánmen jáne Prezıdent Álıevpen sońǵy ret sóıleskenimde, eki basshy da maǵan beıbitshilikke daıyn ekenin aıtty. Armenıa men Ázirbaıjan arasyndaǵy kelispeýshilikterdiń áskerı sheshimi joq. Biraq, meniń oıymsha, kelispeýshilikterdi dıplomatıa arqyly sheshetin turaqty beıbitshilikke aparatyn jol bar. Qurama Shtattar bul kúsh-jigerdi qoldaý úshin qoldan kelgenniń bárin jasaýǵa daıyn", - dedi Blınken.
Eske salaıyq, Armenıa men Ázirbaıjan arasyndaǵy qaqtyǵys 13 qyrkúıekke qaraǵan túni taǵy da ýshyǵa tústi. Armenıa qorǵanys mınıstrligi málimetinshe, Ázirbaıjan shekaradaǵy eldi mekender baǵytynda oq jaýdyrǵan. Baký bolsa, Erevandy shekarada aýqymdy arandatýshylyq jasady dep aıyptady.