Tekserý komısıasynyń ókilderi rastap otyr.
Almatyda sporttyq jáne shyǵarmashylyq tapsyrysty júzege asyrý boıynsha qoǵamdyq jumys tobynyń kezekti otyrysy ótti. Shara barasynda Almaty ákiminiń orynbasary Arman Qyryqbaev Artsport júıesi boıynsha máseleler baryn aıtty, dep habarlaıdy Almaty-akshamy.kz.
«Ózderińiz bilesizder, 2022 jyly qoldanystaǵy vaýcherler boıynsha jetkizýshilerge qyzmetterdi tóleý úshin aǵymdaǵy jyldyń qyrkúıegine deıin bólingeni - 11,7 mlrd teńge. Búgingi tańda artsport.edu.kz saıtynyń derekteri boıynsha shuǵyldanýshylar sany 83 myń balany quraıdy, onyń 35,5 myńy sportpen jáne 47,5 myńy shyǵarmashylyqpen aınalysady. 27 qyrkúıektegi jaǵdaı boıynsha ákimdikte usynylǵan aktiler negizinde bıylǵy jyldyń maýsym aıynan tamyz aıynyń sońyna deıin kórsetilgen qyzmetter úshin 2,2 mlrd teńge kóleminde bereshek bar», - dedi Arman Qyryqbaev.
Qala ákiminiń orynbasary Almaty qalasy ákimdiginiń búdjet komısıasy bul somany maquldap, ótinim máslıhatqa jiberilgeniń aıtty.
«Máslıhat otyrysy 30 qyrkúıekte ótedi. Depýtattar bul ótinishti qoldaıdy dep úmittenemiz. Osy sebepti ákimdiktiń bereshegi máselesi sheshilgen, ıaǵnı máslıhat juma kúni maquldaǵannan keıin, biz odan ári rásimderdiń jyldam ótýine jáne barlyq jetkizýshilermen esep aıyrysýǵa tyrysamyz. Biraq, ózderińiz biletindeı, jalpy, Artsport júıesi boıynsha óte mańyzdy máseleler bar. Muny prokýratýra men tekserý komısıasynyń ókilderi de rastap otyr», - dedi ákimniń orynbasary.
Ári Qaraı Arman Qyryqbaev sport jáne mádenıet basqarmalarynyń mindettemeleri zańnamaǵa jáne baǵdarlamany iske asyrýdyń qoldanystaǵy qaǵıdalaryna qatań sáıkestikte oryndalatynyn aıtty.
«Qazir tekserý komısıasy men prokýratýranyń aldyn ala derekterin eskere otyryp, jyl sońyna deıin qajetti boljamdy qarajat kólemi 8,5 mlrd teńgeden 5 mlrd teńgege deıin tómendegenin túsinemiz. Jaqyn arada tekserý barysynda biz bul kórsetkishtiń odan da azaıatynyna senimdimiz. Bul keıbir jetkizýshilermen jáne kem degende júıeniń ózinde kúrdeli problemalardyń bar ekendigin kórsetedi. Bul týraly biz burynnan aıtyp kelemiz. Degenmen, basqarmalar akseptegen vaýcherler boıynsha barlyq mindettemeler, eger sóz Almaty qalasynda turatyn jáne tirkelgen, seksıalar men úıirmelerge naqty qatysqan adal jetkizýshiler, naqty bar balalar týraly bolǵan jaǵdaıda ǵana oryndalatynyn habarlaǵymyz keledi»,- dedi Arman Qyryqbaev.
Onyń aıtýynsha, qaýip-qater negizinde eshqandaı tólemder, onyń ishinde mıtıńiler, dúrlikpe, haıp jáne t.b. júrgizilmeıdi.
Barlyǵy zań negizinde, tekserý komısıasy men prokýratýra aıtqan tekserýlerdiń nátıjelerine súıene otyryp, jalǵan aqparattyń barlyq túrlerin qospaǵanda, ıaǵnı qatań túrde belgilengen erejeler aıasynda tólenedi.
«El Prezıdentiniń tapsyrmasy biz úshin absolútti basymdyq bolyp tabylady jáne ol kez kelgen jaǵdaıda oryndalady. Biz keıbir jańa erejelerdi mınıstrlik ázirlegenin nemese áli de ázirlenip jatqanyn bilemiz, biraq bul kelesi jyldyń máselesi. Qazir biz qoldanystaǵy erejeler boıynsha jumys isteımiz», - dedi Arman Qyryqbaev.