Qazaqstan Respýblıkasy Premer-mınıstriniń orynbasary – Syrtqy ister mınıstri Murat Nurtileýdiń Amerıka Qurama Shtattaryna resmı sapary aıasynda Qazaqstan Respýblıkasy Prezıdentiniń ekonomıkalyq máseleler jónindegi kómekshisi Qanat Sharlapaevtyń tóraǵalyǵymen dóńgelek ústel ótti.
İs-sharaǵa amerıkalyq transulttyq korporasıalar, ınvestısıalyq qorlar men Qazaqstan Respýblıkasynyń memlekettik organdarynyń ókilderi qatysty. Olardyń qatarynda QR Syrtqy ister mınıstrliginiń Investısıalar komıtetiniń tóraǵasy Ǵabıdolla Ospanqulov boldy.
Kezdesý barysynda ınvestısıalyq seriktestiktiń basym baǵyttary, onyń ishinde shıkizattyq emes sektorlardy damytý, ornyqty ósý tehnologıalary, ınfraqurylym jáne óndiristi jergiliktendirý máseleleri talqylandy. Qazaqstandyq tarap AQSH-ty el ekonomıkasyna 62 mlrd AQSH dollarynan astam tikeleı ınvestısıa salǵan iri ınvestor retinde atap ótip, yntymaqtastyqty odan ári tereńdetýdiń mańyzdylyǵyn jetkizdi.
Ǵ.Ospanqulov AQSH bıznesiniń Qazaqstanǵa degen qyzyǵýshylyǵy artyp kele jatqanyn atap ótti: «AQSH – bizdiń negizgi strategıalyq seriktesimiz. Búginde qazaqstandyq naryqta iri amerıkalyq kompanıalar tabysty jumys isteýde, jáne biz olardyń qataryn keńeıtýge múddelimiz. Biz tek kapıtal tartýǵa emes, birlesken óndiristerdi iske qosýǵa, ozyq tehnologıalardy engizýge jáne jańa eksporttyq taýashalardy damytýǵa umtylamyz. Búgingi kezdesý jańa jobalarǵa qosymsha serpin beredi dep senemiz».
Sondaı-aq sapar aıasynda AQSH Saýda palatasynyń Taıaý Shyǵys, Túrkıa jáne Qazaqstan boıynsha vıse-prezıdenti Djennıfer Mılmen kezdesý ótti. Taraptar Qazaqstan men AQSH arasyndaǵy iskerlik seriktestiktiń aǵymdaǵy jaı-kúıin jáne Qazaqstandyq-amerıkalyq iskerlik keńes aıasyndaǵy ózara is-qımyldy keńeıtý joldaryn talqylady. Ásirese Qazaqstannyń amerıkalyq bıznes qaýymdastyǵy arasynda tanymaldylyǵyn arttyrý jáne naqty ınvestısıalyq bastamalardy iske asyrý máselelerine basa nazar aýdaryldy.
Budan bólek, Komıtet basshysy «Jones Equity Fund», «Heeney Capital», «Honeywell», «IG Global», «Amazon Kuiper», «Jennmar» jáne basqa da kompanıalarmen birqatar ekijaqty kezdesýler ótkizdi.
Qazaqstan tarapy jobalardy tolyq súıemeldeýge, sonyń ishinde ákimshilik qoldaý kórsetýge, memlekettik qoldaý sharalaryna jáne jergilikti seriktesterdi izdeýge daıyn ekenin rastady.