Birlesken jumystyń nátıjesinde 25 eldi mekende eki myń turǵyn úıdi sý basýyna jol berilmedi, sý tasqynynan zardap shekkenderge keltirilgen zalal barynsha azaıtyldy.
Sý tasqynyna qarsy is-sharalarǵa azamattyq qorǵanys júıesiniń, Ulttyq ulannyń, İshki ister organdarynyń úsh myńnan astam qyzmetkeri jáne bir jarym myńǵa jýyq arnaıy tehnıka jumyldyryldy, dep habarlaıdy Almaty-akshamy.kz QR TJM-ǵa silteme jasap.
Oblystaǵy eldi mekenderdi qorǵaý úshin uzyndyǵy 45 km jer úıindilerimen 300 myńǵa jýyq ınertti materıal salynǵan qaptar daıyndaldy.
Sý tasqynyna qarsy kúrestiń aldyńǵy qatarynda Aqmola, Jambyl oblystary jáne Shymkent qalasy Tótenshe jaǵdaılar departamentteriniń qyzmetkerleri, Málik Ǵabdýllın atyndaǵy azamattyq qorǵaý akademıasynyń kýrsanttary men ofıserleri, 5510 áskerı bóliminiń jeke quramy, polısıa qyzmetkerleri men eriktiler boldy.
Kóktemgi sý tasqyny ótken kúrdeli jáne aýqymdy ýchaskelerdiń biri - Atbasar aýdany. Qazirgi ýaqytta Jabaı ózenindegi sý deńgeıi 2,8 metrge deıin tómendedi.
Búgin Atbasar qalasynda sý tasqynyn joıýǵa qatysýshylardy saltanatty túrde shyǵaryp salý rásimi ótti.
Aqmola oblysynyń ákimi alǵysyn bildirip, birlesken kúsh-jiger sý tasqynynyń eń joǵary kezeńderin az shyǵynmen ótkizýge múmkindik bergeniń atap ótti.
«Birlesken jáne jedel kúsh-jigerdiń arqasynda biz sý tasqynynyń aýyr zardaptaryn boldyrmaýǵa jáne eń bastysy - adamdardyń ómirin saqtap qalýǵa qol jetkizdik. Bul iste azamattyq qorǵaý jáne ishki ister, qorǵanys organdarynyń qyzmetkerleri úlken jumys atqardy. Sizder óz mindetterińizdi abyroımen oryndadyńyzdar - adamdardyń ómirin, qaýipsizdigin jáne quqyqtaryn qorǵadyńyzdar. Bizdiń azamattarymyzdyń tynyshtyǵy, olardyń óz ál-aýqatyna degen senimi birinshi kezekte sizdirdiń synı sátterdegi is-áreketterińizge baılanysty», - dedi M. Ahmetjanov.
Sý tasqyny kezinde eriktiler, turǵyndardyń ózderi jáne kásipkerler de úlken kómek kórsetti.
Óńir basshysy qalpyna keltirý josparlaryna toqtaldy.
«Qazir qalpyna keltirý jumystary bastaldy. Úıler, ınjenerlik ınfraqurylym salý boıynsha kóp jumystar atqarýymyz kerek. Bul baǵytta biz kezeń-kezeńmen jumys isteı bastadyq. Birinshi kezekte sý basqan aýyldarǵa kólik qatynasy ashyldy, barlyq ótinish bildirýshilerge birjolǵy tólemder bastaldy, materıaldyq shyǵyndar eseptelýde. Sý tasqynynan zardap shekkenderdiń eshqaısysy da nazardan tys qalmaıdy», - dedi oblys ákimi.
Atbasar qalasynyń turǵyny Ekaterına Matros jaýap sóz sóıledi, ol óz kezeginde barlyq qutqarýshylarǵa alǵysyn bildirdi.
Aıta keteıik, Atbasar aýdanynda avarıalyq-qutqarý jumystaryna 400-ge jýyq adam qatysyp, 70-ten astam birlik arnaıy tehnıka jumyldyryldy.