Almatyda «Apaly-sińlili Naqypbekovalar: erkindikke jol» atty derekti fılm kórermenge jol tartty.
Týyndy klasıkalyq ónerdiń has sheberleri atanǵan qazaq qyzdarynyń ómiri men shyǵarmashylyǵyn baıandaıdy, dep habarlaıdy Almaty-akshamy.kz 24.kz-ke silteme jasap.
Eske sala keteıik, buǵan deıin fılm Londonda tanystyrylǵan. Endi qazaqstandyq kórermenge jol tartty. Alǵashqy kórsetilimi Esentai IMAX Kinopark 11 kınoteatrynda kórsetildi. Apaly-sińlili Naqypbekovalarǵa arnalǵan derekti fılminiń tusaýkeserine olardyń ózi qatysa almady. Degenmen, aıtýly sharaǵa osyndaǵy ónersúıer qaýym jınaldy.
Naqypbekovalar – álemdegi eń úzdik fortepıanolyq trıolardyń biri. Elvıra skrıpkada, Eleonora fortepıanoda, Alfıa vıolonchelde oınaıdy. Batysta «Bekovalar trıosy» degen atpen keńinen tanymal. Fılmdi túsirý týraly bastamany Fransıadaǵy qazaq qaýymdastyǵy kótergen.
«Bular sovet ókimeti tusynda osy elden ketip qalǵan. Olardy dıssıdent dep ataǵan. Solardyń tarıhy týraly. Dıssıdent degen kleımo aldy. Biraq dıssıdent degen kleımosyna qaramaı, bular mine 30 jyl boıy dúnıejúziniń sahnasynda bizdiń eldi qurmettep kórsetip jatyr», - deıdi bar prodúser Berlın Irıshev.
Londonǵa alǵash bolyp, Alfıa barǵan. Ol 1981 jyly gastróldik saparda bolyp, qaıtpaı qalady. Keıin oǵan eki ápkesi baryp qosylady. Sóıtip, qazaq qyzdary klasıkalyk mýzykanyń maıtalmandaryna aınalady.
«Olar sol kezdiń ózinde Odaq kóleminde keńinen tanymal boldy. Ataq, abyroıdan kende bolmady. Biraq mýzykant qyzdar shyǵarmashylyq erkindikti ańsady. Sheteldiń mádenıetimen, ónerimen jaqynyraq tanysqysy keldi. Al bul jaqta ondaı múmkindik bolmaǵany belgili. Alfıa shetelde qalyp qoıǵan soń, olardyń otbasy sol tustaǵy ámirshil-ákimshil júıeniń zardabyn bastan keshirdi», - deıdi senarı avtory Nurgúl Túsipbekova.
Derekti fılm birneshe elde túsirildi. Qazir Alfıa men Eleonora Ulybrıtanıada, Elvıra Italıada turady. Olardyń ónerine qaı elde bolmasyn suranys joǵary.