Qazaq jáne túrki anımasıasynyń negizin qalaýshy Ámen Qaıdarovtyń 100-jyldyǵyna arnalǵan «Ámen aǵanyń ǵajaıyp aǵashy» atty qysqametrajdy anımasıalyq fılm jaryqqa shyǵady, dep habarlaıdy Almaty-akshamy.kz Inform.kz-ke silteme jasap.
Anımasıalyq kartına QR Mádenıet jáne sport mınıstrliginiń tapsyrysy boıynsha Ulttyq kınony qoldaý memlekettik ortalyǵynyń qoldaýymen «Qazaqfılm» kınostýdıasynda túsirilip jatyr. Anımasıalyq fılmniń senarıin Ámen Qaıdarovtyń shákirti Tamara Muqanova men qazaq mıfologıasyn zertteýshi, jazýshy, kınosenarıst Zıra Naýryzbaeva jazdy.
Qazirgi tańda keıipkerlerdiń bastapqy eskızderi daıyn.
«Fılm jelisi Ámen aǵanyń Baýyrjan Nógerbekovtyń «Qarlyǵashtyń quıryǵy nege aıyr?» fılminde jumys istegen jyldarymen tikeleı baılanysty. Ol kisige shabyt qalaı keldi, túsirilim kezindegi bastan keshirgen qıynshylyqtary men qyzyqtary jaıly baıandalady. Negizgi málimetter men ádebı derekter kózi Baýyrjan Nógerbekovtyń «Kogda ojıvaet skazkı» kitabynan alyndy»-, dedi fılmniń qoıýshy rejıseri Janádil Baıdarbekov.
Aıtýynsha, jobaǵa 10-nan asa adam jumyldyrylǵan. Jospar boıynsha jyl sońyna deıin týyndyny aıaqtaý mindeti tur.
«Jalpy 10 mınýttyq fılm jasaýǵa keminde jarty jyl ýaqyt ketedi. Qazir bizde tehnıkalyq turǵydan biraz qıyndyqtar bar. Sebebi sýrette tek múltfılm jasaýshylardy ǵana emes, Ámen aǵanyń janynda jumys istegen ataqty sýretshiler, tanymal kompozıtorlar- Nurǵısa Tilendıev, Oljas Súılemenov syndy mádenıetimizdiń kórnekti qaıratkerleriniń obrazyn, túr álpetin barynsha uqsatyp keltirý úlken jaýakershilikti júktep otyr» dep bólisti rejıser.
Jańa anımasıalyq fılm qazaqstandyq kórermenge aldaǵy jyldyń kóktem aıynda Ámen Qaıdarovtyń 100 jyldyq mereıtoıy qarsańynda jol tartady.