Qazaqstan Respýblıkasynyń Ulttyq kitaphanasynyń N. Dáýletova atyndaǵy zalynda Qazaqstan Jazýshylar odaǵynyń múshesi, Halyqaralyq «Alash» ádebı syılyǵynyń jáne «Parasat» ordeniniń ıegeri, aqyn, aýdarmashy, fılologıa ǵylymdarynyń doktory, profesor, Qazaqstannyń eńbek sińirgen qaıratkeri, R.B. Súleımenov atyndaǵy Shyǵystaný ınstıtýtynyń Bas dırektory Dúken Másimhanulynyń «Altaı bı» atty tarıhı dastanynyń tusaýkeseri ótti. Sharaǵa belgili tarıhshylar, memleket jáne qoǵam qaıratkerleri, BAQ ókilderi jáne basqa da qonaqtar qatysty.
Sharanyń moderatory – «Qurmet» ordeniniń ıegeri, Qazaqstannyń eńbek sińirgen qaıratkeri, Qazaq radıosynyń redaktory Qoshan Mustafa boldy. Konferensıany ǵalym-agronom, aýylsharýashylyǵy ǵylymdarynyń doktory, Qazaq agrarlyq zertteý ýnıversıtetiniń profesory Álimqulov Dámir Málimbekuly ashty.
Shara barysynda L.N. Gýmılev atyndaǵy EUÝ profesory, fılologıa ǵylymdarynyń doktory Serik Nyǵmetollauly Negımov, fılologıa ǵylymdarynyń doktory, profesor Baıynqol Qalıuly, Ál-Farabı atyndaǵy QazUÝ profesory, fılologıa ǵylymdarynyń doktory Qanseıit Ábdezuly, tarıh ǵylymdarynyń doktory, profesor Nábıjan Muhamethanuly, QR UǴA akademıgi Bereket Baqytjanuly Káribaev, Sh.Ýálıhanov atyndaǵy Tarıh jáne etnologıa ınstıtýtynyń bas dırektory, QR UǴA akademıgi Zıabek Ermuhanuly Qabýldınov «Altaı bı» dastanyna qatysty baıandama jasady.
«Altaı bı» kitabynyń tusaýkeserin Baıynqol Qalıuly, Serik Nyǵmetov, Qanseıit Ábdezuly, Nábıjan Muhamethanuly, Bereket Káribaev, Zıabek Qabýldınov, Dámir Álimqulov, Qazybekbı Búıtekuly jáne avtor Dúken Másimhanuly jasady. Dastannyń avtory óz sózinde konferensıa qatysýshylary men qonaqtaryna, sondaı-aq «Naımanbaıuly Altaı bı» qoǵamdyq birlestigine alǵysyn bildirip, kitaptyń shyǵý tarıhyn baıandady.
Tusaýkeser rásiminde aqyn, aýdarmashy Qaster Sarqytahanuly men aqyn Maqsat Erejepov arnaý óleńderin oqydy. Ánshiler Erbol Spandıev pen Serjanáli Álibek «Altaı, bıik tiregim» ánin oryndady.
Konferensıany «Naımanbaıuly Altaı bı» qoǵamdyq birlestiginiń tóraǵasy, zań ǵylymdarynyń kandıdaty, profesor Qazybekbı Búıtekuly qorytyndylady.