Elektr baǵandaryn jańartý úshin qarajat bólingen.
Almaty oblysynyń Qaınazar aýylynda elektr jaryǵy jıi óship qalady, dep habarlaıdy Almaty-akshamy.kz
Jel tursa, aýyl turǵyndarynyń mazasy ketedi.
«Keshe elektr jaryǵy 5 ret óshti. Saqalymdy alyp turǵan edim. Sol kúıi ala almadym. Beredi, óshiredi. Boran bolsa bir sári. Óte jıi óshiredi. Óshpegenniń ózinde qýaty óte álsiz. Úı qarańǵy», - deıdi Omarqajy Shaqaev.
Qaınazar – jarty ǵasyrdan astam tarıhy bar Jambyl aýdanyndaǵy aýyl. Buryn shaǵyn bolǵanymen, qazir irgesi keńigen, 6500 adam turady. Qonystanýshylar kóp.
«Jańa qonystanyp jatqan jaqta sement baǵanalar ornatylǵan. Al myna eski Qaınazarda elektr baǵanalary men symdar 1968 jyldan beri jańartylmaǵan. Tipti elektr symdary da jıi úziledi. Mamandar ony jalǵaýmen ǵana keledi», - deıdi aýyl turǵyny.
Al aýyl ákiminiń ýáji múldem basqa. Aıtýynsha, elektr jaryǵy kúnine 5 ret óshpeıdi. Apattyq jaǵdaı bolǵan kezde jóndeý jumystary ýaqytyly júrgiziledi.
«Elektrıkter aǵash kesetin kezde nemese jóndeý jumystaryna baınalysty óshiretin bolsa, ákimshilik tarapynan halyqqa áleýmettik jeli jáne aýyldyń vatsap chattary arqyly habarlandyrý berilip otyrady», - deıdi Qaınazar aýylynyń ákimi Nurjan Qanaǵatuly.
Jergilikti bıliktiń aıtýynsha, elektr baǵandaryn jańartý úshin qarajat bólingen, jobalyq smetalyq qujattary daıyn. 2023 jyldyń basynan atalǵan joba júzege asa bastaıdy.