COVID-19 vırýsynyń «delta» nusqasy tez juǵady.
Almaty qalasy sanıtarlyq-epıdemıologıalyq baqylaý departamentiniń basshysy Jandarbek Bekshın Óńirlik komýnıkasıalar qyzmetiniń baspasóz konferensıasy barysynda qalalyqtardyń koronavırýsty jıi juqtyratyn jerlerin, sonymen qatar qaterli toptaǵylardy atady, dep habarlaıdy Almaty-akshamy.kz.
Búginde juqtyrýdyń negizgi bes orny bar, olar: saýda obektileri - 32%, otbasylyq baılanys - 16%, qoǵamdyq kólikter - 17,1%, bazarlar - 13%. Jurtshylyq azyq-túlik bazarlarynda jıi juqtyrady - 9%. Sonymen qatar, qazirgi shekteýli sharalar men ujymdyq ımýnıtetiniń artýyna oraı derttiń 2-3%-ǵa tómendegeni baıqalady.
«Turǵyndar arasynda ınfeksıanyń kóbeıý sebepteri – bul áli de kórinbeıtin bıologıalyq qaýipke baılanysty halyqtyń qyraǵylyǵynyń tómendeýinen, COVID-19 vırýsynyń «delta» nusqasynyń tez juǵatynynan», - dedi megapolıstiń bas dárigeri.
Sondaı-aq, Jandarbek Bekshın buqaralyq is-sharalardy ótkizýge tyıym salynǵanyna qaramastan, zań buzýshylyqtardyń azaımaǵanyn aıtty. Almatynyń keıbir turǵyndary bas memlekettik sanıtarlyq dárigerdiń qaýlysynyń talaptaryn elemeı, toı, qudalyq, mereıtoılyq merekeler uıymdastyrýdy toqtatatar emes. Jandarbek Bekshın mundaı sharalardyń saldarynan qala turǵyndarynyń óz densaýlyqtaryna ǵana emes, jaqyndarynyń ómirine de qaýip tóndiretinin taǵy da eske saldy.
SEBD basshysy qala turǵyndary vırýstyń taralý tizbegin qurýdy jalǵastyra otyryp, qala mańyndaǵy aýdandarda jáne jalǵa alynǵan kotejderde otbasylyq merekeler ótkizetinin aıtty.
Jalpy, juqtyrý 20 jastan 39 jasqa deıingi jastar arasynda joǵary - 34%. Bul olardyń úlken mobıldiligine jáne ımmýndaý belsendiliginiń tómendigine ári tyǵyz baılanysta bolýyna baılanysty.
Sózin qorytyndylaǵan Jandarbek Bekshın epıdemıologıalyq jaǵdaıdy turaqtandyrý jáne bilim berý uıymdarynda jańa oqý jylyn qalypty rejımde uıymdastyrý úshin Almatyda qoldanystaǵy shekteý sharalary 31 tamyzdy qosa alǵanǵa deıin uzartylǵanyn atap ótti. Ol almatylyqtardy vaksına saldyrýǵa, ózdiginen emdelmeýge jáne Ashyq qosymshasyn kúndelikti ómirde qoldanýǵa shaqyrdy.