Jobany osy jyldyń sońyna deıin aıaqtaý josparlanýda.
Bul týraly Almatynyń Naýryzbaı aýdanynyń ákimi Sanjar Toǵaı Óńirlik komýnıkasıalar qyzmetiniń baspasóz konferensıasy barysynda málimdedi. Ol bul máseleniń jergilikti atqarýshy organdar úshin birinshi kezektegi mańyzy bar ekenin, ázirge turǵyndardyń 30%-y ǵana taza aýyz sýmen qamtamasyz etilgenin atap ótti. Qalǵan 70%-y ashyq sý qoımalary men jeke skvajınanyń sýyn paıdalanady, dep habarlaıdy Almaty-akshamy.kz.
«Iá, jaz aılarynda aýyz sýdyń tapshylyǵy seziledi, sondyqtan biz sýdy turǵyndarǵa arnaıy tehnıkamen jetkizemiz. Bul qolaısyzdyqtarǵa tıisti jumystar aıaqtalǵansha túsinistikpen qaraýdy suraımyz», - dedi Sanjar Toǵaı.
Ákim Aqjar, Shuǵyla, Tastybulaq, Taýjoly, Jaılaý, Qarǵaly, Quramys shaǵyn aýdandarynda qazirgi ýaqytta 122 shaqyrym sý qubyry men 85 shaqyrym káriz jelilerin tartý jáne Qarǵaly ózenine súzý stansıasyn salý boıynsha jumystar júrgizilip jatqanyn aıtty. Jumys aıaqtalǵan soń aýdannyń 70 myń turǵyny taza aýyz sýmen qamtamasyz etiledi.
Budan ózge, Qaraǵaıly, Qarǵaly jáne Taýsamaly shaǵyn aýdandarynyń turǵyndaryn úzdiksiz jáne sapaly sýmen qamtamasyz etý maqsatynda Qarǵaly ózeninde sý qabyldaıtyn nysannyń qurylysy bastaldy.
Búginde munda sý qory úshin árqaısysy 4000 tekshe metr bolatyn eki sý qoımasynyń, kóldeneń shuńqyrdyń, baqylaý pýnkti bar keńse úı-jaılarynyń blogynyń, kireberis joldyń jáne ınjenerlik jelilerdiń qurylysy boıynsha jumystar júrgizilýde.
Qoldanystaǵy sý qabyldaıtyn qýaty 5440 táý/m³, jobalyq qýattylyqqa sáıkes 2,75 esege 15 000 táý/m3 deıin ulǵaıtý josparlanýda. Jobany osy jyldyń sońyna deıin aıaqtaý josparlanýda.
«Biz halyqtyń ómir súrý sapasyn jaqsartý jáne jaıly ómir súrý ortasyn qalyptastyrý boıynsha jumysty ári jalǵastyramyz», - dep atap ótti Sanjar Toǵaı.