Bul ota mindetti áleýmettik medısınalyq saqtandyrý paketi sheńberinde jasaldy.
Almatylyq dárigerler júrek aqaýymen týǵan sábıge kúrdeli ota jasady, dep habarlaıdy Almaty-akshamy.kz
Perınatologıa jáne balalar kardıohırýrgıasy ortalyǵyna týabitti júrek aqaýy dıagnozymen jańa týǵan náreste tústi. Mamandar tekserý barysynda onyń júregindegi magıstraldi tamyrlardyń jumysy men arterıaldy qan aınalymynyń buzylǵanyn anyqtady. Oǵan mindetti áleýmettik medısınalyq saqtandyrý paketi sheńberinde kúrdeli ota jasaldy.
Jambyl oblysynan kelgen náresteniń ishte jatqanda ottegi tapshylyǵy saldarynan ortalyq júıke júıesi zaqymdalyp, aǵzadaǵy bılırýbın mólsheri de tym joǵary bolǵan. Balalar kardıohırýrgıasy bóliminiń meńgerýshisi Genadıı Nıgaıdyń aıtýynsha, náreste aýrýhanaǵa aýyr halde jetkizilgen.
«Shetinep ketý qaýpi joǵary bolǵandyqtan, jedel túrde ota jasaý qajet boldy. Kardıohırýrgtermen birge kúrdeli ota jasalyp, týabitti júrek aqaýy emdeldi, júrektegi tesik bitelip, qan aınalysy retteldi», - dedi dáriger.
Aıtýynsha, operasıa aqysy mindetti medısınalyq saqtandyrý esebinen tólenedi. 18 jasqa deıingi balalar MÁMS jarnasyn tóleýden bosatylǵan, olar memleket tarapynan saqtandyrylatyn 15 sanatqa kiredi.
«2 saǵatqa sozylǵan operasıa sátti ótti. Qazir náresteniń jaǵdaıy jaqsardy, aýrýhanadan shyǵýǵa daıyndalyp jatyr. Mundaı balalar bolashaqta qalypty ómir súredi, biraq kardıologtardyń baqylaýynda bolýy tıis», - deıdi kardıohırýrg dáriger Qaırat Qýatbekov.