Qala turǵyndary baǵdarlamamen tanysyp, óz usynystaryn «Almatyny damytý ortalyǵynyń» saıtynda 2022 jyldyń 1 shildesine deıin qaldyra alady.
Almaty ákimdigi «Almaty – adamdar úshin jahandyq qala» baǵdarlamasyn ázirledi. Onda megapolısti 2025 jylǵa deıin damytýdyń negizgi basymdyqtary men 2030 jylǵa deıingi orta merzimdi perspektıvalar kórsetilgen, dep habarlaıdy Almaty-akshamy.kz
Joba jeti bólimnen turady: «Jaıly qalalyq orta», «Turaqty ekonomıkalyq ósý», «Basqarylatyn ýrbanızasıa», «Áleýmettik ornyqtylyq pen turaqtylyq», «Jasyl Almaty», «Smart sıtı», «Qaýipsiz qala».
Almatyny keńistiktik damytýdyń negizgi mindeti – jaıly qalalyq orta qurý jáne qalanyń barlyq aýdandarynda ómir súrý sapasyn arttyrý. Ol úshin úsh basym bastama aıqyndaldy: Almatyny kóportalyqty damytý, qoǵamdyq kóliktiń damyǵan júıesi jáne aýdandardyń baılanystylyǵy, jańa tarıftik saıasatty engizý jáne shyǵyndardy azaıtý arqyly TKSH qyzmetteriniń sapasyn jaqsartý.
Qalanyń kóportalyqty damýy Almatynyń jańa bas josparyn bekitýdi kózdeıdi. Munda qoǵamdyq, ekonomıkalyq jáne mádenı belsendiliktiń jańa ortalyqtaryn qalyptastyrý; turaqty jumys oryndaryn qurý; eski turǵyn úılerdi renovasıalaý; ındýstrıaldy aýdandardy qaıta damytý (Almaty-1); kólik ınfraqurylymyn damytý qarastyrylǵan.
Sondaı-aq, osy baǵyt boıynsha 2025 jylǵa deıin bes ortalyqtyń sheberlik-josparlaryn ázirleý jáne bekitý josparlanýda: toqsandyq qurylys; áleýmettik ınfraqurylym obektilerine jáne qoǵamdyq kólikke 15 mınýttyq qadamdyq qoljetimdilik; turǵyn úılerdiń belsendi birinshi qabaty; qalanyń jańa turǵyn jáne qoǵamdyq ǵımarattaryn salý kezinde 100% kedergisiz orta.
2030 jylǵa deıin ortalyqtardyń ekonomıkalyq mamandanýyn eskere otyryp, olardyń qurylymyn qalyptastyrýdy aıaqtaý boljanýda, atap aıtqanda: Soltústik – ekologıalyq zıansyz óndirister, rekreasıa men kógaldandyrýǵa arnalǵan jańa aýmaqtar (ÚAK-nyń, Baým toǵaıy boıynda), damyǵan qyzmet kórsetý salasy; Shyǵys qaqpasy – áýejaı aýdanyndaǵy logıstıkalyq hab jáne kórme-oıyn-saýyq ortalyǵy, medısına, farmasevtıka; Tarıhı ortalyq – týrızm, damyǵan qyzmet kórsetý salasy; Batys – iri ındýstrıaldy kásiporyndar, kólik-logıstıkalyq hab; Ońtústik-batys-shaǵyn ónerkásip parkteri, saýda, logıstıka.
Jaıly qalalyq ortany qalyptastyrýdyń mańyzdy quramdas bólikteri qoǵamdyq kólikti damytý jáne aýdandardyń baılanysyn qamtamasyz etý, jańa tarıftik saıasatty engizý ári shyǵyndardy azaıtý arqyly TKSH qyzmetteriniń sapasyn arttyrý bolyp tabylady.