Bul týraly Óńirlik komýnıkasıalar qyzmetiniń brıfıńinde qalalyq bilim basqarmasy basshysynyń orynbasary Qaırat Jumanov málimdedi. Osylaısha Memleket basshysynyń tapsyrmasy iske asyrylýda, 2025 jylǵa qaraı 9 synyp túlekteriniń 100%-y kolejderde qajetti mamandyqtarda tegin oqı alady, dep habarlaıdy Almaty-akshamy.kz.
Spıker memlekettik tapsyrys jyl saıyn ulǵaıyp kele jatqanyn, sonyń arqasynda tehnıkalyq jáne kásiptik bilim berý qoljetimdi bola bastaǵanyn atap ótti. Almaty, elimizdiń basqa óńirleri sıaqty, suranysqa ıe mamandyqtar boıynsha tegin bilim berýmen júz paıyz qamtýǵa umtylady.
Q. Jumanovtyń aıtýynsha, megapolıste 83 kolej jumys isteıdi, onyń 23-i memlekettik, 60-y jeke menshik. Barlyǵy 73 719 stýdent oqıdy, onyń ishinde memlekettik tapsyrys boıynsha 36,5 myń adam. Búgingi tańda qalada tegin úlgidegi qamtý jalpy kontıngenttiń 49,5%-yn quraıdy.
Stýdentter qatarynda úsh myńnan astamy - syrttan kelgender. Olardyń 29 jataqhanada turýǵa múmkindigi bar.
«Sapaly bilim berý» ulttyq jobasyn iske asyrý úshin 2025 jylǵa deıin memlekettik tapsyrysty eki esege – 21 myń orynǵa deıin ulǵaıtý josparlanyp otyr. Birinshi kezekte 9 synyp túlekterin 2025 jylǵa qaraı 100%-ǵa deıin tegin tehnıkalyq jáne kásiptik bilimmen qamtý josparlanýda», - dedi Q.Jumanov.
Osylaısha 2025 jyly qalalyq kolejderde oqýǵa nıet bildirgen barlyq 9-synyp túlekteri suranysqa ıe mamandyqtar boıynsha tegin bilim ala alady.