Almatynyń qurama komandasy jaratylystaný-matematıkalyq baǵyttaǵy pánder boıynsha respýblıkalyq olımpıadada 43 júldeli orynǵa ıe boldy, atap aıtqanda, 9 altyn, 14 kúmis jáne 20 qola medal. Osylaısha, oqýshylar jalpy esepte birinshi bolyp «Úzdik olımpıadalyq komanda – 2023» syılyǵyn jeńip aldy, dep habarlaıdy almaty-akshamy.kz
Respýblıkalyq olımpıadanyń qorytyndy kezeńinde 53 oqýshy Almaty qalasynyń namysyn qorǵady. Olımpıadaǵa elimizdiń ár aımaǵynan barlyǵy 900-den asa 9-11 synyp oqýshylary qatysty.
Qatysýshylar 2 týrdan turatyn tapsyrmalar oryndady. Olar matematıka, fızıka, hımıa, bıologıa, geografıa jáne ınformatıka pánderi boıynsha zıatkerlik saıystardy qamtydy. Olımpıada 20-25 naýryz aralyǵynda Shymkent qalasynda ótti.
«Barlyq qatysýshylardy kezekti jeńisterimen quttyqtaımyz. Mektep basshylaryna, muǵalimderge kásibı sheberlikteri men biliktilikteri úshin alǵysymyzdy bildiremiz. Ata-analarǵa tárbıesi men kúndelikti eńbegi úshin alǵysymyz bólek. Atap aıtsam, olımpıada jeńimpazdary halyqaralyq olımpıadalarǵa qatysýǵa daıyndalý úshin rezervke alynady. Sondyqtan oqýshylarǵa aldaǵy ýaqytta da bilimderin barynsha jetildirip, tolaıym tabystar men jańa jetistikterge jetýlerine tileımiz!, – dedi «Almaty daryny» ortalyǵynyń dırektory Gúlnár Kárimqajy.
Eske salsaq, osydan birneshe kún buryn Shýche qalasynda 2-7 synyp oqýshylary XVIII Respýblıkalyq «Zerde» baıqaýynda ǵylymı-zertteý jumystary usynylǵan bolatyn. Almaty qalasynyń qurama komandasy I dárejeli – 6, II dárejeli – 6, III dárejeli – 11 dıplom ıegerleri atanyp, erekshe jetistikteri úshin bes oqýshy gramotamen marapattaldy.
Mektep oqýshylarynyń baıqaýlarǵa qatysýy olardyń shyǵarmashylyq qabiletterin, praktıkalyq bilimderin damytýǵa, sonymen qatar daryndy balalardy anyqtaýǵa múmkindik beredi. Aıta keterligi, bıyl respýblıkalyq jarystarǵa qalamyzdan 93 bala qatysyp, onyń ishinde 66 oqýshy júldeli oryndarǵa ıe boldy.
