Almaty qalasynyń Oqýshylar saraıynda Qazaqstan Respýblıkasy Konstıtýsıasynyń 30 jyldyǵyna oraı «APA–2025: AQYL, PARASAT, ABYROY» qalalyq zıatkerlik oıyny ótti, - dep habarlaıdy aqshamnews.kz.
İs-shara Almaty qalasynyń aýmaqtyq saılaý komısıasy, Qazaqstan Respýblıkasy Prezıdentiniń janyndaǵy Memlekettik basqarý akademıasynyń Almaty qalasy boıynsha fılıalynyń uıymdastyrýymen jáne Almaty qalasy Jastar saıasaty basqarmasynyń qoldaýymen ótti.
– İs-sharanyń maqsaty – ulttyq qundylyqtardy, qazaq halqynyń tili men mádenıetin, tarıhy men dástúrlerin nasıhattaý, mádenı muraǵa degen qurmetti qalyptastyrý, ulttyq biregeılikti nyǵaıtý jáne qazaqstandyq patrıotızmdi damytý. «APA–2025» zıatkerlik oıyny – el Konstıtýsıasynyń mereıtoıy qarsańynda jastardyń zıatkerlik áleýetin arttyrýǵa jáne azamattyq sanany nyǵaıtýǵa baǵyttalǵan mańyzdy qadam, – dedi QR Prezıdentiniń janyndaǵy Memlekettik basqarý akademıasynyń Almaty qalasy boıynsha fılıalynyń dırektory Aınur Idrısova.
Zıatkerlik oıyn kvız formatynda boldy, ıaǵnı mektep oqýshylary pikir almasýǵa arnalǵan alańda bilimderin synady. Oıynǵa Almaty qalasynyń ár aýdanynan jınalǵan 10-synyp oqýshylary qatysty. Barlyǵy megapolıstiń ár aýdanynan – Alataý, Almaly, Áýezov, Bostandyq, Naýryzbaı, Medeý, Jetisý, Túrksib aýdandarynan iriktelip kelgen 8 komanda synǵa tústi.
– Almatyda alǵash ret 10-synyp oqýshylary arasynda ıntellektýaldy jarys ótip jatyr. Ol negizgi qujatymyz – Konstıtýsıasynyń 30 jyldyq mereıtoıyna arnalyp otyr. Oqýshylarǵa óziniń tarıhyn, tilin, dilin jaqsy bilýine baılanysty suraq qoıylady. Jalpy 6 bólimnen turady. Osy arqyly jastardyń bilim básekesi shyńdalady. Zıatkerlik oıyn alǵash ret ótkizilip otyr, biraq dástúrli túrde ótkizý josparlanǵan, – dedi «Alatau Aqparat» medıaholdınginiń Bas dırektory Erjan Qalymbaıuly.
Qatysýshylardyń jumystary bedeldi qoǵam qaıratkerleri, bilim jáne memlekettik basqarý salasynyń ókilderinen quralǵan qazylar alqasy tarapynan baǵalanady. Jarys nátıjesi boıynsha Nuraıym Murat, Kamıla Taıgýlova, Mansur Meıirhan, Imanjan Syzdyq jáne Istemı Kenjebaev syndy oqýshylardan quralǵan Medeý aýdanynyń komandasy jeńimpaz atandy.
2-oryn Bostandyq aýdanynan Mádı Asqatuly, Mereı Rysdáýlet, Arýjan Nurǵazy, Adema Albekova, Arına Lepehınaǵa qatarly saıyskerlerge buıyrdy.
3-oryndy Alataý jáne Naýryzbaı aýdandary bólisti. «Alataýlyq» komandany Ábilmansur Abýov, Elnara Myrzabek, Káýsar Ahmetjan, Iasmın Azızova, Amınat Rysqulova qatarly oqýshylar qurasa, Naýryzbaı aýdanynyń namysyn Safınýr Manap, Ásel Amantaı, Gúlnaz Jeksen, Rasýl Aıdynuly, Fatıma Iasynbekqyzy qorǵady. Zıatkerlik oıynnyń barlyq qatysýshylaryna Alǵys hattar men estelik syılyqtar tabystaldy.