Almaty qalasynyń Indýstrıaldy aımaǵynda avtomobıl jáne arnaıy tehnıkaǵa arnalǵan lak-boıaý ónimderin shyǵaratyn jańa zaýyt qurylysy bastaldy. Bul týraly Aqshamnews.kz saıty habarlaıdy.
11,1 mlrd teńge kóleminde ınvestısıa tartylǵan jobanyń iske qosylýy 2026 jyldyń úshinshi toqsanyna josparlanǵan. Zaýyttyń qýattylyǵy jylyna 6 091 tonnany qurap, Qazaqstandaǵy lak-boıaý ónimderine degen ishki suranystyń 11%-yn óteı alady.
Kásiporynda avtokólikter, avtobýstar, júk kólikteri, aýyl sharýashylyǵy jáne qurylys tehnıkalaryna arnalǵan boıaýlar, jol belgilerine arnalǵan materıaldar, sondaı-aq jalpy óndiristik jáne qorǵanysh jabyndary óndirilmek.
Joba aıasynda 84 jańa jumys orny ashylyp, lak-boıaý tehnologıasy men kolorıstıka salasynda 6 jańa mamandyq engiziledi. Óndiristik prosester Qytaı jáne Nıderlandy seriktesterimen birlesip iske asyrylmaq.
TOO bas dırektory Tóreáli Qurmanovtyń aıtýynsha, bul – Ortalyq Azıadaǵy alǵashqy avtomobılge arnalǵan lak-boıaý zaýyty bolmaq. Jobanyń 80%-y buryn Qazaqstanda óndirilmegen ónimderden turady. Naryqqa alǵash ret Made in Kazakhstan tańbasymen boıaý shyǵarylady. Negizgi tutynýshylar retinde avtomobıl, munaı-gaz jáne taý-ken salalaryndaǵy kásiporyndar kózdelýde. Astana Motors-tyń eki zaýytymen ofteık-kelisimshart jasalǵan.
Almaty qalasy ákiminiń orynbasary Álisher Ábdiqadyrov: «Avtomobıl óndirisi jylyna orta eseppen 20% ósip keledi. Sońǵy bes jylda bul sala qalanyń ónerkásip qurylymynyń 30%-yn qurady. Lak-boıaý zaýyty joǵary qosylǵan quny bar óndiristi damytyp, ekonomıkanyń ártaraptanýyna serpin beredi», – dedi.
Aıta keteıik, 2025 jyly Almaty ındýstrıaldy aımaǵynda jalpy quny 135,4 mlrd teńgege 11 joba iske qosylady.