Almaty oblysynyń Dinı máselelerdi zertteý ortalyǵy terorızmge qarsy is-qımyl tásilderi týraly áskerı qyzmetshilerdiń habardarlyǵyn arttyrý maqsatynda profılaktıkalyq is-shara uıymdastyrdy, - dep habarlaıdy malim.kz tilshisi.
Shara barysynda áskerı qyzmetshilerdiń quqyqtyq saýattylyǵyn arttyrý men ekstremıstik uıymdarǵa tartylýdyń aldyn alýǵa baǵyttalǵan synı oılaý qabiletin damytý máselelerine basa nazar aýdaryldy.
Kezdesýge «QR UU 3660» áskerı bóliminiń merzimdi qyzmettegi sarbazdary qatysty. Negizgi spıker – dintanýshy, aqparattyq-túsindirý tobynyń múshesi Ýálı Qaısar Erjanuly boldy. Ol radıkaldy ıdeologıanyń belgileri týraly jan-jaqty túsindirip, ekstremıstik uıymdar qoldanatyn manıpýlásıalyq tásilderdi anyqtaý joldarymen bólisti.
Áńgime barysynda qaýip-qaterler týraly ǵana emes, olardan qalaı saqtanýǵa bolatyny jóninde naqty tásilder de aıtyldy. Mysaly, dinı aǵartýshylyq pen ıdeologıalyq yqpaldyń aıyrmashylyǵyn ajyratý joldary talqylandy.
İs-shara sońynda qatysýshylar mundaı bastamalar áskerı qyzmetshilerdiń radıkaldy ıdeologıa men destrýktıv áserlerge qarsy turý qabiletin arttyrýǵa kómektesetinine senim bildirdi.