Halyqaralyq IQAir kompanıasy jasaǵan reıtıńke álemniń 125 iri qalasy kirgen.
Almaty qalasy taǵy da aýa sapasy nashar qalalar tizimine endi, dep habarlaıdy aqshamnews.kz
Energyprom málimetinshe, bıylǵy mamyr aıynyń ekinshi jartysynda Almaty bul tizimde 42-orynnan kórindi. Qaladaǵy aýanyń lastaný deńgeıi – ortasha, al aýa sapasynyń ındeksi – 61.
Byltyrǵy derektermen salystyrǵanda, mamyr aıy – eń nashar kezeń emes. Almatyda aýa sapasy eń kúrt nasharlaıtyn ýaqyt – jeltoqsan men naýryz aralyǵy, ıaǵnı qystyń eń sýyq kezeńi. Ótken jyldyń qańtar aıynyń ortasynda Almaty tipti naqty ýaqyttaǵy reıtıńte álemdegi eń las qala retinde tirkelip, ındeks 250-den asqan bolatyn. Aýa raıy jylynyp, qys aıaqtalǵan soń da jaǵdaı birshama jaqsarmaıdy. Bul – ońtústik astana úshin jyl saıyn qaıtalanatyn ekologıalyq másele.
«Qazgıdromet» RMK mamandary Almatyny atmosferalyq aýanyń joǵary jáne óte joǵary lastaný deńgeıi bar qalalar qataryna jatqyzady. Mundaı qorytyndy eki ekologıalyq kórsetkish – standartty ındeks jáne lastanýdyń eń joǵary jıiligi negizinde jasalǵan. Sońǵy birneshe jylda Almatyda standartty ındeks kórsetkishi turaqty túrde 5-ten 10-ǵa deıingi aralyqta tirkelip, joǵary lastaný deńgeıine saı kelgen. 2023 jyly bul kórsetkish 15,6-ǵa deıin jetip, óte joǵary deńgeıge jetken.
Eń joǵary jıiliKkkórsetkishi boıynsha da jaǵdaı uqsas: Almatyda bul kórsetkish 20%-dan joǵary bolsa – joǵary, al 50%-dan asqanda – óte joǵary deńgeıge sáıkes keledi. Bul kórsetkishterdiń jıi qaıtalanýy Almaty aýasynyń turaqty túrde lastanatynyn bildiredi.
Aýanyń lastanýyna negizgi sebep – avtokólik. Bul tek boljam emes, Almaty qalasy boıynsha shekti ruqsat etilgen shyǵaryndylar týraly esepke engen naqty derek. Úkimet jarıalaǵan qujatqa sáıkes, jyldyq 189 myń tonna shyǵaryndylar kóleminiń 112,7 myń tonnasy nemese 59,6%-y avtokólik úlesinde. Taǵy 52,1 myń tonna nemese 25%-ǵa jýyǵy – stasıonarlyq kózderden shyǵatyn zıandy zattar.