Almaty ákimi Erbolat Dosaev Memleket basshysynyń qatysýymen ótken megapolısti damytý jónindegi keńeste qalanyń balabaqshalary men mektepterinde kezekti tómendetý boıynsha qandaı sharalardyń qabyldanyp jatqanyn aıtty, dep habarlaıdy Almaty-akshamy.kz.
«Birinshi kezekte, mektepke deıingi bilim berýdegi bul máseleniń sheshimin jeke bıznesti tartýdan kóremiz. Bıyl 76 jekemenshik balabaqshada 5 330 orynǵa tapsyrys ornalastyrylýda. 2023 jyldyń sońyna deıin 860 oryndyq 4 memlekettik balabaqsha ashý josparlanǵan. Mektepterdegi oqýshy oryndarynyń tapshylyǵy ózekti másele bolyp qala beredi. Sondyqtan 2023 jyldyń sońyna deıin jergilikti búdjet jáne jeke ınvestısıalar esebinen 5 670 oryndyq 11 mektep pen qosymsha qurylys paıdalanýǵa beriledi», - dedi Erbolat Dosaev.
Buǵan qosa, ákimdik Saıaly, Zerdeli sh/a-da 2024-2025 jyldary paıdalanýǵa beriletin 1100 oryndyq 2 memlekettik mektep pen 2 950 oryndyq 8 qosymsha qurylysty jobalaý men salýdy jalǵastyryp otyr.
«Qala úshin «Jaıly mektep» ulttyq jobasy erekshe mańyzdy. «Samruk-Kazyna Construction» AQ-men birlesip, búginde mektep qurylysyna ınfraqurylym daıyndaý aıaqtalýda. Bul maqsatqa jergilikti búdjetten 19 mlrd teńge qarastyrylǵan», - dedi Almaty ákimi.
Buǵan deıin Almaty qalasy ákimdiginiń jobalyq keńsesinde habarlanǵandaı, jańa formattaǵy mektepterdiń basym bóligi Alataý jáne Naýryzbaı aýdandarynda 5 mektepten salynady. Bostandyq aýdanynda 4 mektep, Túrksib aýdanynda 3, Áýezov aýdanynda 2 mektep, al qalǵan aýdandarda bir mektepten salý kózdelgen. Mektepter tapshylyq qatty baıqalatyn jerlerde boı kóteredi.
Ári Almatyda 2024-2025 jyldary 1440 oryndyq 2 memlekettik kolej qurylysy júrip jatyr, al bıyl maýsym aıynda Naýryzbaı aýdanynda Balalarǵa arnalǵan ınovasıalyq shyǵarmashylyq ortalyǵy ashyldy. Bıyl 25 tamyzǵa deıin Alataý aýdanynda osyndaı ortalyq ashylady.
Sonymen qatar, bıyl 1 qyrkúıekten bastap alǵash ret 30 mektepte «Mektep avtobýsy» jobasy iske asyrylyp, 100 avtobýs satyp alyndy. 2023 jyly 7,7 myńnan astam bala qamtylady.