Otalardyń bári shaǵyn ınvazıvti ádispen jasaldy.
Almatydaǵy №2 qalalyq klınıkalyq balalar aýrýhanasynda reseılik mıkrohırýrg Andreı Vaıtıngerdiń qatysýymen eki kúndik sheberlik klasy ótti, dep habarlaıdy Almaty-akshamy.kz
Shara barysynda pasıentter bilikti dárigerlerlerden konsýltasıa aldy, mýkopolısaharıdoz aýrýymen aýyratyn 9 balaǵa mindetti áleýmettik medısınalyq saqtandyrý esebinen operasıa jasaldy. Biregeı kúrdeli otalardy reseılik mamanmen birge aýrýhananyń travmatologıa jáne ortopedıa bólimshesi meńgerýshisi Erlan Sadyrbalın men balalar hırýrgi Uljan Soltanbekova jasady.
«Operasıalardyń bári shaǵyn ınvazıvti ádispen jasaldy. Arnaıy quraldardyń kómegimen jasalǵan hırýrgıalyq manıpýlásıa saýsaqtardyń qozǵalysyn qalpyna keltirýge múmkindik beredi. Biregeı operasıalardy jasaý arqyly biz de aldaǵy ýaqytta kádege jaraıtyn úlken tájirıbe jınaqtadyq», - dedi Erlan Sadyrbalın.
Mýkopolısaharıdoz (MPS) – aǵzada glıkozamınoglıkandardyń jınaqtalýy saldarynan bolatyn tuqym qýalaıtyn aýrý. Dáneker tinderdi zaqymdaıtyn dert saldarynan júıke júıesi, kózi, ishki organdary men qımyl-qozǵalys apparatynyń jumysy buzylady. MPS álemde 100 myń adamnyń 50-inde kezdesetin sırek (orfandyq) aýrý.
Qoldyń basy men júıke júıesinde týabitti jáne júre paıda bolatyn syrqattardy emdeýge baǵyttalǵan sheberlik klasy №2 qalalyq klınıkalyq balalar aýrýhanasy jáne «Mıloserdıe» qoǵamdyq qorynyń uıymdastyrýymen ótti.
Esterińizge sala ketsek, operasıalar MÁMS paketi arqyly qarjylandyryldy. Elimizde 18 jasqa deıingi balalar memleket tarapynan saqtandyrylady.