Qaladaǵy aǵashtar jaıy basty nazarda
Almatyda qurttaǵan jasyl jelek ornyna pavlovnıa aǵashyn egý usynyldy, dep habarlaıdy Almaty-akshamy.kz. 24.kz-ke silteme jasap.
Almatydaǵy 3 mıllıonǵa jýyq aǵashtyń tórtten biri jaramsyz. Aǵashtar qartaıyp, kóbine qurt túsken. Osylaı dep dabyl qaqqan tabıǵat janashyrlary qalanyń jasyl jelegine kúrdeli ózgeris kerek deıdi.
Olar shahardyń jasyl qoryn qalpyna keltirip, ekologıasyn jaqsartýdyń tıimdi jolyn usynyp otyr. Jalpaq japyraqty myna aǵashtyń egilgenine 3 jyl ǵana bolǵan. Qazirgi bıiktigi 10 metrge jýyqtaıdy.
Bıolog ǵalymdar men tabıǵat janashyrlarynyń nazaryn aýdaryp otyrǵan pavlovnıa aǵashy osy. Qıyr Shyǵys pen Ońtústik-SHyǵys Azıada keń taralǵan ósimdik Eýropa men Amerıkanyń baqtarynda da jıi ósiriledi. Bul aǵash túriniń elimizde ósetin jasyl jelekterden artyqshylyǵy kóp. Mysaly, pavlovnıanyń bıiktigi 9 jylda 20 metrge deıin jetedi.
Oǵan qosa, jalpaq japyraqtary kómirqyshqyl gazyn ózge aǵashtarǵa qaraǵanda 10 ese kóp sińiredi eken.
«Almaty qalasynda ósirýge bolady. Bir ǵana jaǵdaı - bir jyldyq aǵashty jaqsy kútý kerek. Iaǵnı bir jyldan qystaý fazasyna ketken kezde aǵashty djýt degen materıalmen oraý kerek. Sol kezde onyń tamyryna eshqandaı da úsik barmaıdy. Aǵash úsimeıdi de, ári qaraı ekinshi, úshinshi jyly ósip ketedi», - dedi J. Jıembaev atyndaǵy ósimdik qorǵaý jáne karantın ǴZI jetekshi ǵylymı qyzmetkeri Gúlnaz Meńdibaeva.