Almatynyń shyǵys bóliginde, Táttimbet kóshesi men Dostyq dańǵylyna qatarlasa sozylyp jatqan áıgili Terrenqur demalys aımaǵy aýqymdy qaıta jańǵyrtýdan ótti. Bul qala turǵyndarynyń súıikti serýen ornyna aınalǵan erekshe meken.
4 gektardan asatyn aýmaqta zamanaýı talapqa saı jaıly keńistik jasalyp, ár jastaǵy kelýshilerge arnalǵan demalys aımaqtary boı kóterdi. Jańa jaıaý júrginshiler joldary tóselip, «densaýlyq soqpaǵy» keńeıtilip, jańartyldy. Saıabaqtyń ár bóligin jalǵap turǵan aǵash kópirden Esentaı ózeniniń ásem kórinisi kóz tartady.
Uzaq jyl qańyrap jatqan sý aıdyny tazartylyp, bekitilip, jaǵalaýy kórkeıtildi. Ózen jaǵasynda óner sahnasy, qarsy betinde ashyq aspan astyndaǵy amfıteatr paıda boldy.
Belsendi demalys úshin úsh tenıs ústeli, tórt shahmat ústeli jáne zamanaýı sport jabdyqtary ornatylǵan vorkaýt aımaqtary jasaldy. Balalar úshin eki zamanaýı oıyn alańy men oıyn ekologıalyq oıyn aımaǵy quryldy.
Saıabaqtyń basty nyshany – altyn kúmbezdi appaq rotonda erekshe túrge endi. Onyń aınala qorshaǵan joldar ilmeli gúlzarlarmen bezendirildi.
Saıabaq aýmaǵyna 30 jańa oryndyq qoıylyp, avtomatty sýarý júıesi men zamanaýı jaryqtandyrý ornatyldy.
Búginde Terrenqur «densaýlyq soqpaǵy» ǵana emes, sonymen qatar kezdesý men serýendeýge arnalǵan jaıly oryn. Munda kún saıyn 3500-den astam qala turǵyny men týrıs keledi.
Aıta keteıik, bul aýmaq jeke menshikke tıesili bolǵandyqtan, munda 20 jyldan astam jóndeý júrgizilmegen. 2023 jyly jer telimi komýnaldyq menshikke qaıtarylyp, sodan keıin qaıta jańǵyrtýǵa arnalǵan jobalyq-smetalyq qujattamany ázirleý jumystary bastaldy.
2024 jyly qurylys-montaj jumystary bastaldy. Jobanyń basty maqsaty – Esentaı ózeni boıyndaǵy jáne Terrenqurdaǵy eki tanymal jaıaý baǵytty biriktirip, qala turǵyndarynyń súıikti ornyna aınaldyrý.