Instıtýtta 6 mamandyq jáne 14 biliktilik boıynsha mamandar daıyndalady. Oqý merzimi – 4 jyl
Áskerı mamandyq alǵysy keletinder Saǵadat Nurmaǵambetov atyndaǵy Qurlyq áskerleriniń Áskerı ınstıtýtyna túse alady. ÓKQ ótken brıfıńte ınstıtýt bastyǵynyń oqý jáne ǵylymı jumys jónindegi birinshi orynbasary, polkovnık Jánibek Sargazın oqý ornyna qabyldaý, irikteý erejeleri jáne oqý prosesi týraly baıandady, dep habarlaıdy almaty-akshamy.kz
Onyń aıtýynsha, Qazaqstan Respýblıkasy Qarýly Kúshteriniń, áskerı quralymdarynyń jáne basqa da áskerleriniń ofıserlik quramynyń 80% astamy ınstıtýt túlekteriniń esebinen tolyqtyrylady.
«Instıtýttyń negizgi mindeti – qurlyq áskerleriniń joǵary mamandandyrylǵan ofıserlerin daıarlaý. Qazaq áskeri úshin ofıserler daıyndaýda ustahanaǵa aınalǵan oqý ornymyz qashanda aldyńǵy qatarda. Instıtýt zamanaýı oqý-ádistemelik bazamen, tehnıkalyq oqý quraldarymen qamtamasyz etilgen. Instıtýttyń leksıalyq aýdıtorıalary men kabınetteri áskerı mamandardy daıarlaýǵa qajettiniń bárimen jabdyqtalǵan», - dedi ol.
Instıtýtta 6 mamandyq jáne 14 biliktilik boıynsha mamandar daıyndalady. Oqý merzimi – 4 jyl. Osy ýaqytta kýrsanttar úsh mezgil tegin tamaqpen, aqshalaı stıpendıa jáne áskerı kıimmen qamtamasyz etiledi.
«Kýrsanttarǵa tegin medısınalyq kómek kórsetiledi. Demalys jylyna eki ret beriledi: qysta on tórt kún, jazda bir aı. Shákirtaqyǵa keletin bolsaq, onyń mólsheri 1-2 kýrs úshin 12 627 teńge, 3-4 kýrs úshin 21 915 teńge. Instıtýtta bolashaq ofıserlerdi daıyndap, sapaly joǵary bilim alý úshin barlyq jaǵdaı jasalǵan», - dep qosyp ótti J. Sargazın.
Spıkerdiń aıtýynsha, úmitkerlerdiń jaramdylyǵyn densaýlyq jaǵdaıyn, psıhologıalyq jáne fızıkalyq daıyndyǵyn baǵalaý kezinde komısıa anyqtaıdy.
- 50 jyldyq tarıhy bar oqý orny 17 myńnan astam bilikti ofıser daıyndap shyǵardy. 85-ten astam general shyǵardy, olardyń arasynda qyzmetin jalǵastyryp jatqandary da bar, - dep qorytyndylady spıker.