14-23 naýryz aralyǵynda Almatyda Naýryz meıramyn merekeleý aıasynda 500-den astam túrli is-sharalar uıymdastyrylady.
Basty oqıǵalardyń biri – «Kósh. Naýryz –dýman» 21 naýryzda ótedi, dep habarlaıdy almaty-akshamy.kz.
At jáne kostúm sherýine 500-ge jýyq adam qatysady. Merekelik basty konsertter 21 naýryzda Astana alańynda jáne Respýblıka saraıynyń aldyndaǵy alańda, sondaı-aq qala aýdandarynyń barlyq negizgi alańdarynda uıymdastyrylady.
Sonymen, 10 kún ishinde «Naýryznama» kezeńinde almatylyqtar men megapolıs qonaqtary qolónershiler men qoldanbaly ónerdiń taqyryptyq kórmelerine, spektáklder men konsertterge, shyǵarmashylyq sheberlik synyptary men poezıa keshterine, merekelik qaıyrymdylyq aksıalaryna, jastar festıválderine, zıatkerlik oıyndarǵa, ulttyq sport túrleri boıynsha jarystarǵa jáne túrli konkýrstarǵa qatysa alady. Aıta keterligi, 25 jáne 50 jyl buryn otbasyn qurǵan erli-zaıyptylar arasynda «Kúmis kerege» jáne «Altyn shańyraq» baıqaýy uıymdastyrylady. Sondaı-aq, medısınalyq mekemelerde qala turǵyndary úshin skrınıngten jáne profılaktıkalyq tekserýlerden ótý boıynsha aksıalar josparlanǵan.
Zamanaýı ulttyq kıim tiginshileri «Tumar» sán aptalyǵyna qatysyp, kórermenderdi qýantpaq. Sondaı-aq sán ındýstrıasynyń ókilderi Fashion show ulttyq kıim konkýrsyna qatysatyn bolady. Etnodızaınerler odaǵy 17-24 naýryz aralyǵynda Arbatta 100-ge jýyq kásibı sheberlerdiń qatysýymen qolóner jármeńkesin ótkizedi. Ekoaktıvıster, komýnaldyq qyzmet ókilderi men belsendi azamattar aǵash otyrǵyzý, sý aıdyndaryn tazartý jáne aýla aýmaqtaryn jınaý boıynsha aksıa ótkizedi.
Almatynyń barlyq teatrlarynda balalarǵa da, eresekterge de arnalǵan qoıylymdar kórsetiledi. Mysaly, Qýyrshaq teatry qazaq halyq ertegileri negizinde «Qańbaq shal», «Ur, toqpaq!» jáne «Er Tóstik» qoıylymdaryn usynady, Qazaq memlekettik sırki balalar úılerine baryp birneshe qaıyrymdylyq qoıylymdar ótkizedi, al «Almaty áýenderi» ártisteri áleýmettik qyzmet kórsetý ortalyqtarynda qaıyrymdylyq konsertter uıymdastyrady. Sondaı-aq «Alataý» dástúrli óner teatry «Mámlúk. Sultan Beıbarys» spektaklin qoıyp, birqatar qaıyrymdylyq konsertin ótkizedi, Almaty mýzeılerinde Ashyq esik kúni, Yqylas atyndaǵy halyq mýzykalyq aspaptar murajaıynda «Án júırigi Birjan sal» atty teatrlandyrylǵan mýzykalyq kesh uıymdastyrady, Memlekettik muraǵatta qazaq halqynyń salt-dástúrleri: uzatý, bet-ashar, tusaý keser, atastyrý, qala kitaphanalarynda vıktorına, kitap jármeńkeleri jáne basqa da taqyryptyq is-sharalar ótedi. Sonymen qatar, Almatyda 14-30 naýryz aralyǵynda Nauryz fest jastar festıvali jáne 21-23 naýryz aralyǵynda Astana alańynda 10:00-de toǵyzqumalaq, asyq atý, bes asyq, arqan tartý, qazaq kúresi sıaqty ulttyq sport túrleri boıynsha sport festıvali ótedi.
Naýryz meıramyndaǵy merekelik konsertter birneshe lokasıalarda ótedi: 21 naýryz kúni saǵat 11:00-de «NAÝRYZ – BEREKE BASTAÝY» merekelik konserti Astana alańynda ótse, 21 naýryzda saǵat 11:00-de T. Júrgenov atyndaǵy Qazaq ulttyq óner akademıasynyń aýmaǵynda jáne 21 naýryz kúni saǵat 12:00-de Abaı atyndaǵy alańda (Respýblıka Saraıynyń aldy), sondaı-aq 21-22 naýryzda Astana alańynda saǵat 19:00-den 22:00-ge deıin tanymal ártisterdiń qatysýymen konsertter ótedi. Sonymen qatar, 21-23 naýryz aralyǵynda Arbatta (Panfılov-Jibek joly kóshesi) Naýryz meıramyna arnalǵan oıyn-saýyq-tanymdyq baǵdarlamalar uıymdastyrylady.
Naýryz meıramyn merekeleý aıasynda Almatyda josparlanǵan mádenı-buqaralyq is-sharalar men túrli konkýrstardyń tizimi qala ákimdiginiń resmı saıtynda jarıalanǵan.