Almaty Qalalyq kardıologıalyq ortalyǵynda júrekke hırýrgıalyq aralasýdyń jańa ozyq tehnologıasy - mınıınvazıvti torakoskopıalyq ota jasalatyn boldy.
Bul súıek qurylymyna zaqym keltirmesten omyrtqa aralyq ota jasaýǵa múmkindik beretin júrek aýrýyn hırýrgıalyq emdeýdiń eń jaqsy ádisiniń biri. Atalǵan ádis asqyný qaýpin aıtarlyqtaı azaıtady jáne pasıentterge qalpyna kelýdiń yńǵaılylyǵyn qamtamasyz etedi, dep habarlaıdy almaty-akshamy.kz.
Bul hırýrgıalyq aralasýdy oryndaý kezinde Qalalyq kardıologıalyq ortalyqta álemdegi jetekshi óndirýshilerdiń eń zamanaýı jabdyǵy qoldanylady.
"Osy ınovasıalyq ádisti engize otyryp, biz endi atrıventrıkýlárlyq klapandarda (mıtraldy, aortalyq) rekonstrýktıvti, klapandy saqtaıtyn otany, sondaı-aq klapandardy protezdeýdi jasaı alamyz. Búgin biz mıtraldy qaqpaqshanyń prolapsy bar 32 jastaǵy naýqasqa ota jasadyq, oǵan beınetorakoskopıalyq qoldaýdyń kómegimen mıtraldy qaqpaqshanyń mınıınvazıvti plasıkasy jasaldy", - dep bólisti kardıohırýrgıa bólimshesiniń meńgerýshisi Nurjan Músirepov.
Ota Novosıbırsk qalasynan kelgen tájirıbeli kardıohırýrg, m.ǵ.k. Alekseı Pıvkınmen ótkizilgen master klass aıasynda júrgizildi.
Almaty Qalalyq kardıologıalyq ortalyǵynyń dırektory Roza Qýanyshbekovanyń aıtýynsha, Ortalyqta jyl saıyn júrekke 500-ge jýyq ota jasalady.
"Qalalyq kardıologıalyq ortalyq mınıınvazıvti torakoskopıalyq otany belsendi túrde engizip keledi jáne ota barysyn barynsha arttyrýǵa umtylady. Mınımaldy ınvazıvti kardıohırýrgıalyq ota hırýrgıadaǵy revolúsıalyq serpilistiń bir túri. Sebebi ol dástúrli otaǵa balama bolyp tabylady.
Bul tásil pasıentterdi jyldam ońaltýdy qamtamasyz etip qana qoımaı, sonymen qatar kosmetıkalyq nátıje beredi. Mundaı otadan ótken pasıentterde qalpyna kelý ýaqyty azaıa túsedi jáne otadan keıingi asqyný qaýpine baılanysty qalypty ómirge tezirek oralady, óıtkeni keýde múshelerine dástúrli aralasý úlken kesýdi, keń qoljetimdikti qajet etedi, bul pasıent úshin aýyr jaraqatqa ákeledi. Bizdiń maqsatymyz - pasıentterge júrek aýrýyn emdeýdiń ozyq ádisine qol jetkizýdi qamtamasyz etý jáne olarǵa múmkindiginshe tezirek tolyqqandy ómirge oralýǵa kómektesý", - dep bólisti Roza Qýanyshbekova.
Almatyda qan aınalymy júıesiniń aýrýlary jıi kezdesedi. Almatydaǵy árbir úshinshi turǵyn osyndaı aýrýmen aýyrady. Sondyqtan Qalalyq kardıologıalyq ortalyq almatylyq kardıohırýrgtardy emdeýdiń jańa ádisine úıretý úshin master klastar ótkizý arqyly pasıentterdiń osy sanatyna kómek kórsetý kezinde emdeýdiń eń zamanaýı ádisterin qoldanýǵa tyrysady.