Almatyda qalalyq ekologıa basqarmasymen birlesip tabıǵatty qorǵaý prokýratýrasy ázirlegen Atmosferalyq aýany qorǵaý jónindegi is-sharalar jospary aıasyndaǵy jumys jalǵasýda, dep habarlaıdy aqshamnews.kz
Sarapshylardyń málimetinshe, megapolıstegi aýa lastanýynyń shamamen 60%-y avtokólikterden keledi. Sondyqtan joldarda da, avtobazalarda da shyǵaryndylardy baqylaý kúsheıtilgen. Bıylǵy josparǵa komýnaldyq, jolaýshylar jáne júk kólikterin tekserýge arnalǵan jeke baǵyt engizildi. Jyljymaly ekologıalyq zerthanalar kólikter paıdalanylatyn oryndarǵa shyǵyp, olardyń tehnıkalyq jaǵdaıyn jáne shyǵaryndylar deńgeıin tirkep, yqtımal artyq shyǵaryndylardy anyqtaıdy.
Kezekti ekologıalyq reıd Túrksib aýdanynda ótti. Onda ekologıa basqarmasynyń mamandary, polıseıler jáne ekoaktıvıster jeńil kólikter men avtobýstardy tekserdi. Vodıteler anyqtalǵan zańbuzýshylyqtardy joıý jóninde usynystar aldy, al «Renesans plús» JSHS-nyń jyljymaly zerthanasy kólikterdiń tehnıkalyq jaǵdaıyn jáne shyǵaryndylaryn tirkedi.
«Sońǵy jyldary qalanyń ekoposttar jumysy kúsheıgennen keıin, normadan asyp turǵan kólikterdiń úlesi azaıdy. Alaıda azot totyǵýy jáne basqa da lastaǵyshtardyń jalpy deńgeıi áli joǵary. Elektromobılder sany ósip keledi, biraq olardyń úlesi az bolǵandyqtan, qalanyń ekologıasyna aıtarlyqtaı áser ete almaı otyr», – dedi «Renesans plús» kompanıasynyń aǵa ekology Islambek Nurmaǵambetov.
Reıdke qatysqan ekolog-ǵalym Evgenıı Mýhamedjanov qoldanystaǵy normalar barlyq lastaýshy zat túrlerin qamtymaıtynyn atap ótti: «Biz ár joly júrgizýshilerdi jaýapkershilikke tartýǵa bolatyn kórsetkishterdi tirkeımiz – al olardyń basym bóligi norma sheginde. Biraq aýa sapasyna qatty áser etetin basqa zattar da bar, al bizde olardy baqylaý quraly joq. Talaptar men standarttardy jańartý qajet. Eger búgin qolǵa alsaq, birneshe jylda qalypty aýamen demalatyn bolamyz», – dedi ol.
Avtobýs parkteriniń ókilderi de óz málimdemesinde jelige tek jańa, tabıǵı gazben júretin avtobýstar shyǵarylatynyn, olardyń tehnıkalyq jaǵdaıyna baqylaý kúsheıtilgenin aıtty. Qalalyq avtoparkterdiń maqsaty – qoǵamdyq kóliktiń turaqty jumysyn qamtamasyz etý jáne atmosferaǵa túsetin zıandy azaıtý.
Eco Almaty JSHS-nyń atmosferalyq aýa departamentiniń basshysy Aıdana Qasenniń aıtýynsha, reıdtik tekserister qala boıynsha júrgizilip jatyr. Sońǵy reıdterdiń birinde 20 avtokólik tekserilip, ekeýinen normadan asqan kórsetkishter anyqtalǵan.
Sarapshylardyń aıtýynsha, Qazaqstanda keıbir tehnıka sanattary úshin shyǵaryndylardyń naqty standarttary áli bekitilmegen, sondyqtan qazirgi ólshengen kórsetkishter keıingi standarttaýǵa negiz bolady.
Bıyl Almatydaǵy 19 stasıonarlyq jáne 2 jyljymaly ekopostta 186 385 ólsheý jasalyp, ÁQBtK-niń 334-baby boıynsha shamamen 20 myń ákimshilik hattama toltyrylǵan. Eskertýler men aıyppuldardy qosa alǵanda, jalpy somasy 653 mln teńgeden asty. Bul sharalar baqylaý júıesiniń jumys istep turǵanyn kórsetedi, alaıda aýa lastanýyn azaıtý úshin standarttar men normatıvterdi jetildirý negizgi qadam bolyp qalyp otyr.
Atqarylýy tıis problemalyq máseleler boıynsha Almaty qalasynyń ákimdigi qoldanystaǵy tabıǵat qorǵaý zańnamasyn ózektendirý úshin ortalyq memlekettik organdarǵa birqatar usynystar daıyndap jatyr.