Almaty qalasy boıynsha QAJ departamentiniń №11 mekemesinde jazasyn óteýshi jasóspirimder úshin «Kitap oqýǵa qushtarlyq!» atty shekteýsiz oqý jobasy aıasynda erekshe is-shara uıymdastyryldy, dep habarlaıdy aqshamnews.kz.
Polisia.kz-tiń habarlaýynsha, bul rýhanı sharaǵa Almaty qalasynyń Jambyl atyndaǵy qalalyq jasóspirimder kitaphanasynyń oqyrmandarǵa qyzmet kórsetý bóliminiń meńgerýshisi Jumahan Nulyhan men Sharaına Qumarova ádil qazylyq etti. Sonymen qatar mekemedegi jalpy bilim beretin mekteptiń til mamandary A. Alıeva men E. Býtenko da belsene qatysty. İs-sharada on tórt jazasyn óteýgi jasóspirim ózderi oqyǵan kórkem shyǵarmalardy tanystyryp, olardyń mazmunyn, tárbıelik mánin, úlgi alarlyq tustaryn sheber jetkizdi.
Jyrlardy naqyshyna keltirip mánerlep oqý, prozalyq týyndylardy áserli baıandaý arqyly olardyń kitap oqýǵa degen qyzyǵýshylyqtary men shynaıy qushtarlyqtary anyq baıqaldy. Oqýshylardyń júreginen oryn tapqan shyǵarmalar qatarynda Uly Abaıdyń óleńderi, Beıimbet Maılın, Berdibek Soqpaqbaev, Asqar Súleımenov sekildi qazaq ádebıetiniń kórnekti tulǵalarynyń týyndylary, Agata Krıstıdiń detektıvteri, orys klasıkteriniń shyǵarmalary, sondaı-aq qazirgi zamanǵy ádebıet ókilderiniń eńbekteri de bar.
Jastardyń bos ýaqytyn paıdaly ótkizip, kórkem ádebıetke bet burýy laıyqty baǵalandy. Belsendi qatysýshylar mekeme basshylyǵy atynan alǵys hattarmen jáne syı-sıapattarmen marapattaldy. İs-shara sońynda mekeme bastyǵy Almat Súleımenov qonaqtarǵa alǵys aıtyp, jasóspirimderdi kórkem ádebıet arqyly bilimge, rýhanı damý men til baılyǵyn arttyrýǵa, ádebı muralardy dáriptep, nasıhattaýǵa shaqyrdy.
– Bul joba – jas urpaqtyń sanaly bolashaǵyna baǵyttalǵan mańyzdy qadam, – dedi ol.
İs-shara barysyndaǵy árbir sóz, árbir oqylǵan shyǵarma jasóspirimderdiń jan-dúnıesine úmit sáýlesin uıalatqandaı boldy.