Olar mekemedegi alǵashqy kúni karantınge jatqyzylady.
Ońaltý ortalyqtarynda oryn tapshy. Almatydaǵy Áleýmettik beıimdeý ortalyǵyn qazirdiń ózinde turaqty mekeni joq 185 adam panalap otyr, dep habarlaıdy Almaty-akshamy.kz Almaty.tv-ge silteme jasap.
Mekeme qyzmetkerleri olardyń sany qytymyr qystyń aıazdy kúnderine baılanysty áli de arta túsetinin aıtady. Odan bólek, barar jeri, basar taýy qalmaı, kóshe kezgender qatarynyń kóbeıýi de sebep bolǵan kórinedi.
Áleýmettik beıimdeý ortalyǵynyń qyzmetkerleri dál osy kólikpen qalany kúndelikti aralap, panasyzdar kezdesse, olardy tıisti mekemege jetkizip otyrady. Turaqty mekeni joqtar da, ásirese, aıazdy kúnderde mamandardyń usynysyna birden kelise ketedi. Sebebi olar da jylý izdeıdi. Alaıda degeninen qaıtpaı, bas tartyp jatatyndardyń da baryn ortalyq qyzmetkerleri joqqa shyǵarmady.
«Olarǵa kóshede ómir súrý obrazy unap qalǵandyqtan... Bizdiń ortalyqta ishimdik ishýge, bireýmen tóbelesýge, urys-keris shyǵarýǵa tyıym salynǵan. Sondyqtan kóshede qalyp, iship júre bergendi jón kóretin adamdar bar», – dedi psıholog Juldyz Álmaǵanbetova.
Qalanyń ár buryshynan ákelingen panasyzdar mekemedegi alǵashqy kúni karantınge jatqyzylady. Tórt ýaqyt ystyq tamaqpen, taza kıimmen, tósek-orynmen qamtamasyz etiledi. Odan bólek, kelgenderdiń barlyǵy ózi týraly birer aqpar berip, psıhologıalyq kómek alady.
Panasyz qalǵan jandar bul ortalyqqa jetkizilgennen keıin mindetti túrde medısınalyq tekserýden ótedi. Qyzmetkerlerdiń aıtýynsha, munda jetkizilgen adamdardyń kóbinde úsik alý, irińdeý syndy túrli dene jaraqaty anyqtalyp jatady.
Mekeme basshylyǵynyń sózinshe, munda eshkimdi májbúrlep ustamaıtyndyqtan, baıaǵy ádetine basyp, ortalyqtan ketip qalatyndar da barshylyq. Alaıda ómirin ózgertýdi qalaıtyndardyń sany da az emes kórinedi. Mysaly, ortalyqty 1 jyldan astam ýaqyt panalap jatqan Mahabbat Qaıdarovanyń taǵdyr tálkegine túspes buryn joǵary bilimi men jeke kásibi bolǵan.
«Jubaıymnyń ólimi aýyr soqqy boldy. Ony emdeý úshin nesıe men qaryzǵa battym. Shyǵyn da kóbeıdi. Al barlyǵyn qaıtarýǵa qarajatym bylaı tursyn, múlkim de jetpedi. Sodan úıimdi sattym. Dymsyz dalada qaldym», – dedi qyzmet alýshy Mahabbat Qaıdarova.
Mekeme qyzmetkerleriniń sózine sensek, «qańǵybastar» qataryna qosylǵandardyń deni - ishimdiktiń kesirinen barynan aıyrylǵandar. Aıta ketsek, Áleýmettik beıimdeý ortalyǵynda shamamen 200 adamǵa oryn bar.
«Kúnniń sýytýyna baılanysty qyzmet alýshylar sany kúndelikti ósip jatyr. Byltyrǵy jyly bizdiń ortalyqtan, statısıka boıynsha, 927 adam qyzmet alyp shyqqan. Kelgeni bar, ketkeni bar. Shyǵady, keledi. Ornyna basqalary kelip jatady», – dedi «Pana» áleýmettik beıimdeý ortalyǵynyń dırektory Bolat Aıtmurzaev.
Mekeme dırektorynyń sózine sensek, oryn tapshylyq máselesin sheshý maqsatynda búginde 140 adamǵa arnalǵan taǵy bir ortalyqtyń qurylysy júrip jatyr. Iaǵnı, jaqyn arada myna mekemeni pana etkenderdiń bir bóligi sonda kóshýi múmkin.