On jylda Almaty qalasy boıynsha er adam bedeýligi 47,3%-ǵa ósken
Búgin Ortalyq qalalyq klınıkalyq aýrýhana bazasynda Qazaqstan ýrologtarynyń plenýmy ótkizilip, onda Qazaqstannyń barlyq túkpirinen kelgen tanymal ǵalymdar men ýrolog-mamandar qatysty, dep habarlaıdy Almaty-akshamy.kz.
Plenýmǵa qatysýshylar ýrologıalyq qyzmet úshin aıtarlyqtaı máselelerdiń, ásirese, ýrologıanyń mamandary potensıalynyń damýy, bilim baǵdarlamalaryn júzege asyrý, rezıdentterdi daıyndaý sapalyǵyn jaqsartý, ýrologıalyq nozologıa boıynsha tarıfterdi ulǵaıtý, emdeý hattamalaryn jańartý, jańa dıagnostıkalyq yńǵaılar jáne ýrologıaǵa ınovasıalyq tehnologıalardy engizýdi qarastyrdy.
Sonymen qatar, májiliste jetekshilik etetin halyqaralyq mamandarmen is-tájirıbemen almasý jóninde aıtyldy.
Plenarlyq májiliste Qazaqstan ýrologtar Qaýymdastyǵynyń Prezıdenti Myrzakárim Alshynbaev, «S.D. Asfendıarov atynd. QazUMÝ» KEAQ rektory Marat Shoranov, «Astana Medısınalyq ýnıverstıteti» KEAQ rektory Qamaljan Nadyrov, «Qazaqsta-Reseı medısınalyq ýnıverstıteti» KEÝQ rektory Nurlan Jaınaqbaev, Nur-Sultan qalasy Qoǵamdyq densaýlyq saqtaý basqarmasynyń basshysy Tımýr Muratov, «Áleýmettik medısınalyq saqtandyrý qory» KEAQ tóraǵasynyń orynbasary İlıas Muhamedjan, oblystardan kelgen bas ýrologtar, sondaı-aq, Almaty qalasynyń medısınalyq uıymdarynyń bas dárigerleri baıandama sóz sóıledi.
Aıta ketetin jaıt, qalalyq klınıkalyq aýrýhanada bıylǵy jyly Ýrologıa jáne andrologıa ortalyǵy ashylyp, onda nesep joly júıesiniń túrli aýrýshańdyǵymen aýratyndarǵa konsýltatıvtik, dıagnostıkalyq, emdik jáne aldyn alý kómegi kórsetilýde.
Ortalyq álemdik standart talaptaryna saı keletin KT, MRT, ekspert klasty ÝZI apparat, qashyqtyq tolqyndy-soqqyly lıtotrıpter, robottalǵan ońaltý kesheni, vaporızasıa jáne rezeksıa jasaýǵa arnalǵan týlııli lazerli kópfýnksıalyq hırýrgıalyq júıe sekildi jańa qural-jabdyqtarmen jabdyqtalǵan.
Sondaı-aq, Ortalyq nesep joly júıesine KT, rentgendik zertteýge túsirý, qural-saımandyq jáne zerthanalyq tekserister júrgizý múmkindigi qaralǵan jáne qadamdyq qana jerde ornalasqan, munda taldamalardy alý, spermogramma taldamasyn júrgizý qarastyrylǵan.
Myrzakárim Alshynbaev sóılegen sózinde atap ótkendeı, búgingi kúni er adamnyń densaýlyǵy problemasy álem boıynsha óte kúrdeli bolyp tabylady jáne de jyl saıyn pasıentterdiń sany ósýde. On jyldyq kezeń ishinde Almaty qalasy boıynsha er adam bedeýligi 47,3%-ǵa, nesep-tas aýrýy - 33,9%-ǵa ósken. Kezdesý aıaqtalǵannan soń qatysýshylarmen ýrologıalyq qyzmetti budan da myqty damytý qorytyndysy jasaldy.