Segiz tonna sıntetıkalyq esirtki óndirisine jol berilmedi.
İİM esirtki qylmysyna qarsy is-qımyl departamenti óndiristik aýqymda sıntetıkalyq esirtki shyǵarý úshin elge prekýrsorlar jetkizýdi jolǵa qoıǵan Qazaqstan men shetel azamattarynan quralǵan transulttyq qylmystyq toptyń qyzmetin toqtatty, dep habarlaıdy Almaty-akshamy.kz Polisia.kz-ke silteme jasap. .
Jedel ýákilder zerthanada sıntetıkalyq preparattardy óndirý úshin qoldanylatyn prekýrsorlardy jetkizý arnalaryn anyqtaý boıynsha arnaıy operasıalar júrgizdi. Toptyń árbir múshesiniń rólin jáne basqa adamdardyń qatysýyn anyqtaý úshin “arnaıy júk” búkil marshrýt boıy baqylaýda boldy. Oǵan áýe arqyly barlaý da qoldanyldy. Ótken jyldyń qazan aıynda arnaıy operasıanyń bastapqy kezeńinde, sondaı-aq aǵymdaǵy jyldyń naýryz aıynda prekýrsorlardyń kontrabandasyna qatysqan úsh sheteldik azamat elden tys jerlerde ustaldy.
Operasıanyń sońǵy kezeńinde 21 naýryz kúni Almatyda osy is boıynsha qalǵan fıgýranttar – kórshiles elderdiń eki azamaty jáne qazaqstandyq quryqtaldy. Olardan ártúrli salmaqta mefedron, sheteldik polısıa qyzmetkeriniń jalǵan kýáligi, zıp-paketter, elektrondyq tarazylar, Kalashnıkov avtomatynyń 7,62 mm kalıbrli patrondary tárkilendi. Qoımalardy tintý barysynda İİM jáne Almaty qalasy polısıa departamentiniń qyzmetkerleri sıntetıkalyq esirtkilerdi daıyndaý úshin qoldanylatyn prekýrsorlardy, sondaı-aq eki reaktordy, ıaǵnı sıntetıkalyq esirtkilerdi daıyndaýǵa arnalǵan arnaıy zerthanalyq jabdyqty tárkiledi. Tárkilengen prekýrsorlardyń jalpy kólemi 72,7 tonna.
Osylaısha 8 tonna sıntetıkalyq esirtki óndirýge jol berilmedi. Bul - 8 mıllıon bir rettik doza. Kúdiktilerdi ustaýdyń aldynda prokýratýramen kelisilgen arnaıy jedel-izdestirý jáne tehnıkalyq is-sharalar kesheni júrgizildi. Qazirgi ýaqytta tergeý áreketteri júrgizilýde. İİM sıntetıkalyq esirtki óndirilgenge deıin prekýrsorlardy joıý jumysyn jalǵastyrýda.