Dana bılerdiń dara joly.
Almatyda «Dala ekspedısıasy negizindegi derekter jáne el birligin eselegen Altaı bı Naımanbaıuly» atty halyqaralyq ǵylymı-tájirıbelik konferensıa ótti, dep habarlaıdy Almaty-akshamy.kz.
Almaty qalasynyń Ǵylym ordasynda qala ákimdiginiń qoldaýymen «Altaı bı» qoǵamdyq qory uıymdastyrǵan «Dala ekspedısıasy negizindegi derekter jáne el birligin eselegen Altaı bı Naımanbaıuly» atty halyqaralyq ǵylymı-tájirıbelik konferensıasy boldy. Atalmysh jıyn Ádiletti Qazaqstan qurý jolynda tarıhı sana men eljandylyq qasıetterdi qalyptastyrý jáne Altaı bı Naımanbaıulynyń ómiri men jońǵar basqynshylaryna qarsy kúrestegi erligin talqylaý mysalynda qazaqstandyq patrıotızmdi nyǵaıtý maqsatynda ótti.
«Qazaq dalasy erte zamandardan-aq qazaq memlekettiliginiń negizin qalyptastyrýda aıanbaı qyzmet etken, ádildiktiń aq týyn bıik ustanǵan dana bıleri men ójet batyrlarynyń qyzmetimen tarıhta oryn alǵan. Qazaq-jońǵar soǵysy dáýirinde qazaq bıleri óziniń sheshendik sózderiniń máni men dıplomatıalyq sheberligimen qazaq tarıhynda esimderi órnektelip, halyq sanasynda máńgilik este qalǵan. Qazaq tól tarıhyndaǵy bıler arasyndaǵy kórnekti tarıhı tulǵalardyń biri – Alban taıpasynyń Qyzylbórik rýynan shyqqan, tanymal Ájibaı batyrdyń aǵasy Altaı bı Naımanbaıuly», – dep atap ótti shara uıymdastyrýshylary.
Konferensıaǵa qala ákimdiginiń ókilderi, Almatynyń joǵary oqý oryndarynyń profesorlary men oqytýshylary, Qyrǵyzstan zertteýshileriniń delegasıasy jáne Altaı bı Naımanbaıulynyń urpaqtary qatysty.
