QMA Almaty qalasy boıynsha departamenti «Sincere System Group» (S-Group) kompanıasynyń ókilderi qarjylyq pıramıda qurǵanyn anyqtap, sotqa deıingi tergeýdi bastady, dep habarlaıdy Almaty-akshamy.kz QMA baspasóz qyzmetine silteme jasap.
QMA baspasóz qyzmetiniń málimetinshe, qyzmetkerler belsendi azamattardyń qatysýymen kompanıanyń qyzmetin erte kezeńde toqtatyp, bul aldanǵan ınvestorlardyń sanyn azaıtýǵa múmkindik berdi.
«S-Group kompanıasynyń ókilderi salymshylarǵa aıyna 6%-dan 8%-ǵa deıin nemese jylyna 70%-dan astam joǵary kiristilikke ýáde berdi. Depozıttiń eń tómengi somasy $100 quraıdy. Sondaı-aq, salymshylardy tartqan jaǵdaıda somanyń 5 paıyzy kóleminde kepildendirilgen kiris qarastyrylǵan»,-dep jazylǵan QMA baspasóz qyzmetiniń habarlamasynda.
Bul rette klıentterge aqshany qabyldaý faktisin rastaıtyn qujattar men kelisimder usynylmaǵan, salym somasy jeke kabınette sıfrlyq túrde kórsetilip, salynǵan qarajatty alý múmkindigi bolmaǵan.
«Qazirgi ýaqytta sotqa deıingi tergeý amaldary júrgizilýde. Kúdiktige qatysty «qamaý túrindegi» bultartpaý sharasy sanksıalandy», -dep jazylǵan habarlamada.
Eger siz jáne sizdiń týystaryńyz «S-Group» kompanıasynyń qyzmetinen zardap shekse, Almaty qalasy boıynsha Ekonomıkalyq tergeý departamentine nemese QMA call-ortalyǵyna habarlasyńyz.
QR Konstıtýsıasynyń 77-babynyń 3-tarmaǵynyń 1-tarmaqshasyna jáne QR Qylmystyq-prosestik kodeksiniń 19-babynyń 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árkim kinásiz dep esepteledi.