Joba boıynsha keńes berý jáne ony qoldaý qyzmetin Qoldaý kásipkerlik ortalyǵynyń menedjerleri kórsetti.
Kásipkerlikti damytý jónindegi ulttyq jobanyń aıasynda óteýsiz ınovasıalyq grantty Almaty qalasynyń turǵyny Saıat Nurly utyp aldy, dep habarlaıdy Almaty-akshamy.kz
Jas jigit pikirles adamdar tobymen birge Grafen (https://grafen.kz/) sıfrlyq ónimin ázirlep shyǵardy. Grafen – bilim berý ortalyqtaryna, kompanıalar men aqparatty bıznesmenderge arnalǵan biregeı platforma, ol jeke vıdeooqýlyqtardy júkteýge jáne satýǵa múmkindik beredi. Platforma naqtyly ýaqytta tusaýkeser kórsetilimderdi tanystyrýǵa jáne onlaın-oqytýlar ótkizýge múmkindik beredi.
«Kóptegen IT-jobalar sıaqty platforma qurý týraly oı pandemıa kezinde týǵan bolatyn. Ol kezde ózimnen kishi inim ekeýmizdiń oqytý ortalyǵymyz bar bolatyn, kóp uzamaı TJ rejıminen soń jáne qashyqtyqtan jumys isteýge kóshkennen keıin bizge jedel túrde onlaın nysanyna qaıta kóshýge týra keldi. Bastapqyda biz ZOOM arqyly oqytyp júrdik, alaıda, qoldanbalardyń shekti qyzmetteri bizdiń kóńilimizden shyqpady, al naryqta biz qajetti platformany taba almadyq. Osy sátte, biz ózimizdiń paıdaly ónimimizdi oılap tabýdy sheshtik», – deıdi Saıat Nurly.
Onyń aıtýynsha, jobany qurý kezinde halyqaralyq IT-kompanıasymen yntymaqtastyq tájirıbesi kóp kómektesken. Kreatıvti ázirleýshiler tez arada top quryp, daıyndyq prosesin bastap ketedi.
«Bizge alǵashqy ónimdi shyǵarýǵa jáne testilik rejımde jumysty bastaý úshin 1 jyl kerek boldy. Árıne, ózekti máseleler boldy, biraq biz úmit úzbeı, jumysty jalǵastyrdyq», – dep túsindirdi ol.
Sol kezde Saıattyń inisi ári seriktes áriptesi oǵan Qoldaý kásipkerlik ortalyǵyna júginýdi usynǵan.
«Bul kútpegen jaǵdaı boldy, biz memlekettik qoldaý kórsetýdiń is júzinde qalaı bolatynyn bilmedik. Alaıda, ortalyqtyń qyzmetkerleri túsindirý jumystaryn jedel júrgizdi ári bıznes-jospar qurý qyzmetin tegin kórsetti jáne kómektesti, sondyqtan biz olarǵa óte rızamyz. Nátıjesinde biz jasaǵan jobamyz úshin qajetti tehnıka satyp alýǵa 4 mln teńge utyp aldyq», – dedi Saıat.
Búginde Grafen otandyq platformasynda 1 myńnan astam belsendi paıdalanýshylar tirkelgen, olar yńǵaıly ýaqytta oqıdy jáne alǵan bilimderi boıynsha álemniń kez-kelgen túkpirimen baılanysa alady.