Megapolıs ákimi Baqytjan Saǵyntaev «Tóregeldi Sharmanov Qory» Qamqorshylyq keńesiniń jıynyna qatysty. Jıyn barysynda densaýlyq saqtaýdy damytýǵa eleýli úles qosqan sheteldik jáne qazaqstandyq ǵalymdardyń eńbegi atap ótildi, dep habarlaıdy almaty-akshamy.kz
Profesor Tóregeldi Sharmanovty týǵan kúnimen quttyqtaı otyryp, Almaty ákimi Baqytjan Saǵyntaev onyń otandyq densaýlyq saqtaý júıesiniń qalyptasýy men damýyna qosqan zor úlesin atap ótti.
Baqytjan Saǵyntaev koronavırýs pandemıasyna qarsy kúresip júrgen medısına qyzmetkerlerine alǵys aıtty. Búkil qoǵamnyń kúsh-jigeriniń, azamattardyń jaýapkershiliginiń ári medıkterdiń erlikke toly jumystarynyń arqasynda pandemıa shegine bastady.
2021 jylǵy 16 aqpanda Qazaqstanda «Tóregeldi Sharmanovtyń halyqaralyq qory» quryldy, onyń qyzmeti densaýlyqqa qatysty jalpyǵa birdeı quqyq ıdeıasyn damytýǵa baǵyttalǵan. Qor qyzmeti aıasynda Sharmanovtyń halyqaralyq syılyǵynyń laýreattaryna marapattar saltanatty túrde tabys etildi. Alqaly marapatqa alǵashqy medısınalyq-sanıtarlyq kómekti damytýǵa qosqan úlesi úshin Djons Hopkıns ýnıversıtetiniń sheteldik ǵalymdary Devıd Bıshaı men Maık Shlaıf, sondaı-aq qazaqstandyq dárigerler, COVID-19 dıagnostıkasy men emdeý hattamasyn ázirleýshi ınfeksıonıster – Baqyt Kósherova men Amangúl Dúısenova ıe boldy.
«Tóregeldi Sharmanovtyń halyqaralyq qorynyń» mısıasy densaýlyq saqtaý jáne durys tamaqtaný salasyndaǵy jas jáne bolashaǵy zor ǵalymdardyń jobalaryn qoldaý bolyp tabylady. Budan basqa, qor dıetologıamen aınalysatyn álemdik akademıalyq ortalyqtarda mamandardyń taǵylymdamasyna granttar berýdi josparlaýda.
Tóregeldi Sharmanov – elimizdegi medısınanyń iri uıymdastyrýshylarynyń biri, Qazaqstan men Ortalyq Azıa respýblıkalaryndaǵy nýtrısıologtar mektebiniń negizin qalaýshy. Ol 1978 jyly Almatyda Dúnıejúzilik densaýlyq saqtaý uıymy men IýNISEF qamqorlyǵymen alǵashqy medısınalyq-sanıtarlyq kómek jónindegi halyqaralyq konferensıany ótkizýdiń bastamashysy retinde álemdik jáne qazaqstandyq densaýlyq saqtaýǵa zor úles qosty. Konferensıa qorytyndysy boıynsha álemdik densaýlyq saqtaýdaǵy negizgi qujattardyń biri – Almaty deklarasıasy qabyldandy, onda alǵashqy medısınalyq-sanıtarlyq kómektiń ulttyq júıesin uıymdastyrý tujyrymdamasy alǵash ret baıandaldy.