«QAZAQTYŃ QAHARMAN QYZY» atty merekelik konsert ótedi.
Sáýirdiń 13 kúni Almatydaǵy Qurmanǵazy orkestriniń konsert zalynda Qazaqstannyń Halyq artısi, Halyq qaharmany Roza Baǵlanovanyń 100 jyldyq mereıtoıyna arnalǵan «QAZAQTYŃ QAHARMAN QYZY» atty merekelik konsert ótedi, dep habarlaıdy Almaty-akshamy.kz.
Konserttik baǵdarlamada Qazaqstannyń halyq artısi Nurǵalı Núsipjanov, Sulýshash Nurmaǵanbetova, Altynbek Qorazbaev, Gúlnár Sıqymbaeva, Jubanysh Jeksenuly, Jeńis Ysqaqova, Igor Blagodarnyı, Aıgúl Imanbaeva, Asqat Úrpekov, Shaba, Baýyrjan Isaev, Zarına Jakenova syndy artıser men Qurmanǵazy atyndaǵy Qazaq ulttyq orkestri óner kórsetedi.
«Aıta keteıik, bul mereıtoı 1 naýryz kúni Mádenıet jáne sport mınıstrligine qarasty «Qazaq áýenderi» AQ-nyń uıymdastyrýymen Elordamyzdaǵy «Qazaqstan» konsert zalynda bastaý alǵan edi. Sol saltanatty konsertte Mádenıet jáne sport mınıstri Dáýren Abaev myrza IýNESKO deńgeıinde toılanatyn tulǵalar tizimine engen dańqty ánshiniń ǵasyrlyq toıy resmı túrde bastalǵanyn aıryqsha atap ótip, mereıtoı respýblıka kólemindegi is-sharalarǵa ulasatynyn aıtqan bolatyn. Endi mine, Roza Tájibaıqyzy 1960 jyldan bastap, ómiriniń sońyna deıin jemisti eńbek etken "Qazaqkonserttiń" Almatydaǵy burynǵy ǵımaratynda, qazirgi Qurmanǵazy orkestriniń konsert zalynda kúmis kómeı ánshiniń tamasha ánderi shyrqalatyn bolady», - delingen Mádenıet jáne sport mınıstrliginiń baspasóz qyzmetiniń habarlamasynda.
