Almatyda tańnan bastap qala turǵyndary referendýmǵa belsendi qatysyp, saılaý ýchaskelerinde daýys berip jatyr. Olardyń qatarynda tanymal mádenıet qaıratkerleri, ǵalymdar jáne artister bar, dep habarlaıdy aqshamnews.kz.
Qazaqstannyń eńbek sińirgen qaıratkeri, kıno jáne teatr aktrısasy, telejúrgizýshi Qaragóz Súleımenova da referendýmǵa qatysty. Aktrısa №77 orta mektepte ornalasqan №414 saılaý ýchaskesinde daýys berdi.
Qaragóz Súleımenova elimiz úshin mańyzdy sheshimder qabyldaý kezinde azamattardyń bir kisideı qatysýy mańyzdy ekenin atap ótti.
«Árqaısymyz osyndaı mańyzdy is-sharalarǵa qatysýymyz kerek, óıtkeni ol balalarymyzdyń bolashaǵyna áser etedi. Referendým ár azamatqa pikirin bildirýge jáne tańdaý jasaýǵa múmkindik beredi», - dedi Qaragóz Súleımenova.