Respýblıka boıynsha jyl basynan beri qyzylsha aýrýyn juqtyrý qaýpine qatysty 300-den astam derektiń 200-i rastaldy.
Mamandar elimizde epıdemıologıalyq jaǵdaı máz emes dep dabyl qaǵyp otyr. Aýrý órship turǵan óńirdiń biri - Almaty. Munda 130-ǵa jýyq adamǵa qyzylsha dıagnozy qoıyldy, dep habarlaıdy Almaty-akshamy.kz 24.kz-ke silteme jasap.
Onyń basym bóligi - balalar. Dárigerler aýyrǵandardyń barlyǵy qyzylshaǵa qarsy ekpe almaǵan deıdi. Mamandardyń aıtýynsha, vaksına saldyrmaǵandar arasynda indet aýyr ótedi.
«Kóp jaǵdaıda ókpeniń qabynýy vırýstyq pnevmonıa, budan keıin kezdesetin balalardyń, ásirese, egilmegen balalardyń kózine zaqym kelýi múmkin konúktıvıt túrinde. Balalar soqyrlyqqa ushyraýy múmkin. Odan keıin birneshe jyldan keıin bolatyn asqynýlar bar. Mysaly, ensefalıt mıdyń qabynýy. Bul - jazylmaıtyn aýrý», - deıdi Memlekettik sanıtarılyq-epıdemıologıalyq baqylaý komıteti basqarmasynyń basshysy Nurshaı Ázimbaeva.
Qyzylshaǵa qarsy ekpe balanyń bir jasynda, odan keıin altyǵa kelgende salynady. Budan soń aýrýdan qorǵanysh kórsetkishi 95 prosentke joǵarylaıdy. Dárigerlerdiń aıtýynsha, onyń belgileri sýyq tıýdiń belgilerine óte uqsas. Bórtpe shyqqan kúnniń ózinde naqty dıagnozy zerthanalyq saraptamadan soń belgili bolady. Ásirese, oǵan 5 jasqa deıingi balalar kóp shaldyǵady.
«Zıan dep oılaıdy. Sebebi ártúrli jelide túrli aqparat, burmalanǵan aqparat júredi. Solardy estip alǵan ata-analar, kóbisi dinı aǵymdaǵy ata-analar bar, sondaı ata-analar ýaqytynda sol ekpeni almaı qarsy ne jazyp bergen bolatyn. Epıdemıologıalyq jaǵdaıdyń órshýine baılanysty osyndaı balalardyń ata-analarymen jumys jasap jatyrmyz», - deıdi dáriger Uljan Qurmanaeva.
Iá, ata-analardyń keıbiri aýyrǵan balada ımýnıtet qalyptasady, dep oılaıdy. Biraq ol qalyptasqanymen ınfeksıa adam aǵzasynda kóp jyl boıy saqtalady. Álsiregen kezde qaıta beleń alyp, basqa da sozylmaly aýrýlardyń bas kóterýine alyp keledi. Mamandar aýyrý arqyly ımýnıtet qalyptastyrsa bul jaǵdaıda bir paıyzdan alty paıyzǵa deıin asqynýlar kezdesýi múmkin ekendigin alǵa tartady. Aýyryp ımýnıtet alǵannan, aýyrmaı vaksına qalyptastyrǵan durys deıdi olar.
Qyzylsha aýa tamshylary arqyly adamnan-adamǵa tez taraıdy. Eger de halyqtyń 90 prosenti egilgen bolsa, taralmaı toqtap qalýy múmkin.
2019 jyly elimizde qyzylshadan 21 adam kóz jumǵan. Onyń 19-y bala.