Dostyq úıinde Qazaqstan halqy Assambleıasynyń 30 jyldyǵyna arnalǵan «Qazaqstan – beıbitshilik pen birliktiń kepili» atty etnomádenı birlestikterdiń respýblıkalyq konferensıasy ótti. Qatysýshylar Assambleıanyń otyz jyldaǵy jetistikterin, etnosaralyq kelisim men ulttyq birlikti nyǵaıtý tájirıbesin, sondaı-aq 2026 jylǵa arnalǵan josparlardy talqylady.
İs-sharaǵa etnomádenı birlestikterdiń, úkimettik emes uıymdardyń jáne megapolıstegi QHA qurylymdarynyń ókilderimen qatar Almaty qalasy ákiminiń orynbasary Abzal Núkenov, QHA Tóraǵasynyń orynbasary Marat Ázılhanov jáne qala İshki saıasat basqarmasynyń basshysy Aıdar Esenbekov qatysty.
Almaty qalasy ákiminiń orynbasary Abzal Núkenov óz sózinde QHA-nyń oń rólin jáne qazaqstandyq kelisim modeliniń biregeıligin atap ótti.
– Táýelsizdik týraly aıtqanda, eń aldymen birlikti aıtamyz. Birlik bolmasa, táýelsizdik te bolmaıdy. Qazaqstandyq birliktiń negizgi tirek tetikteriniń biri – Assambleıa. QHA – memleket pen qoǵammen úılesimdi jumys isteıtin biregeı ınstıtýt. Biz barlyq etnomádenı birlestikterdiń úlesin joǵary baǵalaımyz jáne jobalaryn júzege asyrýda tabys tileımiz, – dedi Abzal Núkenov.
Qazaqstan halqy Assambleıasy Tóraǵasynyń orynbasary, QR Prezıdenti Ákimshiligi QHA Hatshylyǵynyń meńgerýshisi Marat Ázılhanov uıymnyń 30 jyldyǵy el úshin tarıhı oqıǵa bolǵanyn atap ótti. Sondaı-aq ol Assambleıanyń mısıasy – qoǵamnyń birligin qamtamasyz etý jáne barlyq qurylymdar men birlestikter úshin úlgi bolý ekenin eske saldy.
– Assambleıa – saıası partıalar, kásipodaqtar men qoǵamdyq uıymdardyń jumysy qurylatyn negiz. Bizdiń maqsatymyz – memleket ınstıtýttarynyń barlyǵymen birlese otyryp, birlikti saqtaý, – dep qosty spıker.
Konferensıa tájirıbe almasý, ózekti máselelerdi talqylaý jáne Qazaqstan halqy Assambleıasynyń halyqtyq dıplomatıa ınstıtýty retindegi rólin nyǵaıtý úshin mańyzdy alańǵa aınaldy. Qatysýshylar birlik, dostyq jáne mádenı áralýandyq qundylyqtaryn ilgeriletý jumysy kelesi jyly da jańa jobalar men bastamalar arqyly jalǵasatynyn atap ótti.