Jalpy, sot sheshimimen 682 sheteldik elden shyǵaryldy.
Almatyda jyl basynan beri 4 myńǵa jýyq sheteldik azamat kóshi-qon zańnamasyn buzǵan, dep habarlaıdy almaty-akshamy.kz.
Almaty qalalyq PD kóshi-qon qyzmetiniń málimetinshe, jyl basynan beri qalaǵa 23 myńǵa jýyq shetel azamaty kelgen.
Almaty – ınfraqurylymy damyǵan, ózindik mádenıeti bar shahar, sondyqtan alys jáne jaqyn shetelderden kelgen sheteldikterdiń qyzyǵýshylyǵyn oıatady. Kóshi-qon aǵyny jyl saıyn artyp keledi. Bul ekonomıkaǵa oń áserin tıgizgenimen, jalpy qylmystyq jaǵdaıǵa keri áserin tıgizip jatyr. Iaǵnı quqyq buzýshylyq sany ósip jatyr. Aýyr qylmys tirkelýde. Máselen, Almatynyń Túrksib aýdanynda shetel azamaty óziniń tanysyn óltirgen. Al Medeý aýdanynda Úndistan men Pákistannyń eki azamaty sıntetıkalyq esirtki shyǵaratyn zerthana uıymdastyrǵan. Sheteldik stýdentterdiń qatysýymen bolatyn tóbelester de kóptep kezdesedi, – dedi Almaty qalalyq PD kóshi-qon qyzmeti basqarmasynyń bastyǵy Asqat Býtýnchınov.
Sondaı-aq Býtýnchınovtyń sózinshe, Almatyda QR-nyń kóshi-qon zańnamasyn buzýshylyqtardy anyqtaý jáne jolyn kesý maqsatynda turaqty negizde jedel-profılaktıkalyq is-sharalar júrgizilip jatqanyn atap ótti.
Jyl basynan beri Qazaqstannyń kóshi-qon zańnamasyn buzǵany úshin 8 myńnan astam adam ákimshilik jaýapkershilikke tartylsa, onyń 4 myńǵa jýyǵy shetel azamattary eken.
Jalpy, sot sheshimimen 682 sheteldik elden shyǵaryldy. Almaty polısıasy elge keletin shetel azamattaryna Qazaqstan Respýblıkasynyń zańnamasyn qatań saqtaý qajettigin eske salady.